Guovdageainnu sátnejođiheaddji lea dál gearggus šiehtadallagoahtit Kárášjoga gielddain, gávnnahan dihte gos NAV Sámi váldokantuvra galgá leat boahtteáiggis.
Guovdageainnu sátnejođiheaddji lea dál gearggus šiehtadallagoahtit Kárášjoga gielddain, gávnnahan dihte gos NAV Sámi váldokantuvra galgá leat boahtteáiggis.
Guovdageainnu suohkanstivra čuovvolii ovdagotti mearrádusevttohusa, ja ovttajienalaččat mearridedje addit válddi sátnejođiheaddjái šiehtadallat Kárášjoga gielddain verddesuohkan-šiehtadusa NAV-ovttasteamis.
Eará sániiguin šiehtadallat gos váldokantuvra galggašii leahkit NAV Sámis.
– Jáhkán prošeakta soaitá doaibmat ovdamearkan movt mii eará surggiin sáhttit hukset stuorát fágabirrasiid. Go geavahuvvo hui dávjá ággan min vuostá ahte fágabirrasat leat beare unnit, dáinna lágiin čájehit ahte hukset fágabirrasiid, ja dasa lassin várra máilmmi nannoseamos fágabirrasa mii guoská sámi gelbbolašvuhtii, lohká Guovdageainnu sátnejođiheaddji Johan Vasara.
– Sihkkarastit ahte NAV kantuvrrat bisuhuvvet
Stuoradiggedieđáhusas lea Stuoradiggi bivdán ráđđehusa oktiičaskit NAV-kantuvrraid vai riikkas leat vánit ja stuorát NAV-kantuvrrat.
Danne lea ge čuožžilan NAV Sápmi bargu, mii lea Kárášjoga ja Guovdageainnu NAV-kantuvrraid ovttasteapmi.
Mađi stuorát NAV-kantuvra lea, dađi eambbo válddi oažžu kantuvra, ja dađi jođáneappot manná áššemeannudeapmi.
Vasara lea olu juo gulahallan Kárášjoga gielddain NAV Sámi barggu birra. Goappaš suohkaniin lea ballu manahit kantuvrrain válddi ja bargonávccaid.
– Dáinna bargguin leat sihkkarastime alccemet ahte mis galgá ain leahkit NAV-kantuvra boahtteáiggis. Signálaid vuođul mat bohtet NAV Finnmárkkus deavdit gáibádusaid ahte mis lea stuora NAV kantuvra, go šaddá oktasaš jođiheapmi. Mis lea buorre gulahallan Kárášjoga gielddain, ja mii leat ovttaoaivilis go lea sáhka virggiid juogadeamis, de galgat geahččalit juogadit seamma meari goabbáige. Lea vuođđun vai goappaš suohkanat galget dovdat ahte lea ávkin.
Suohkanstivra lea dál vuos addán válddi šiehtadallat, ja go šiehtadus lea gárvvis, de galgá fas suohkanstivra dohkkehit šiehtadusa.
Ii dehálaš goabbá lea verdde
Guovdageainnu NAV-kantuvrra hoavda Marja Eira lohká ahte ii leat dehálaš goabbá suohkan šaddá verddesuohkanin, muhto lea dehálaš ahte NAV Sápmi álggahuvvo.
– Dat mii lea dehálaš dán áššis lea ahte eat manat makkárge doaimmaid. Kárášjogas ja Guovdageainnus mis leat seamma hástalusat, ja lea dehálaš ahte sámi álbmot oažžu diehtit iežaset vuoigatvuođaid seamma ládje. Dat goabbá šaddá verdden, das lea goit ge geatnegasvuohta loktet politihkalaš dássái jus juoga rievdá nu ahte olbmuid fálaldat hedjona eai ge oaččo dan masa lea riekti, lohká Eira.
Son sávvá ovttasbargu álggahuvvo, go buoremus sámi álbmogii livččii ahte boađášii oktasaš kantuvra, mas lea sámi stivrejupmi.
– Jus galgá bagadallat olbmo barggu guvlui, de ferte dovdat vuođđoárvvuid. Jus dovdá kultuvrra, de lea álkit boahtit sáhkalaga. Jus manahit dan earáide, de manná guhkit áigi.
Stuorát kantuvrrat ožžot eambbo válddi
Guovdageainnu NAV-kantuvrra hoavda Marja Eira čilge ahte NAV čuovvu regiovnnalaš vuogádaga, ja go Romsa ja Finnmárku oktiičaskojuvvojit oktan regiovdnan, de čuovvu NAV maid.
Dasto šaddá sámi jietna vel unnit NAV vuogádagas.
– Ii leat čielggas oččošii go NAV Sápmi eambbo válddi, dat lea negatiivvalaš, muhto buorre lea ahte sámi NAV áššit ožžot njuolggogeainnu regiovnnalaš dássái. Dan maid dieđán lea jus mii bissut ná unnin, de eat oaččo dan válddi deike sámi áššemeannudeddjiide, lohká Marja Eira.
Kárášjogas eai ollen liikká guhkás áššiin
Kárásjoga sátnejođiheaddji Svein Atle Somby lea maid positiiva ovttasbargui, muhto lohká ahte eai leat liikká guhkás ollen vel proseassas go Guovdageainnu suohkan.
– Dát ášši ii boađe gielddastivrii ovdal go čakčat. Mii leat positiivvat, ja galgat oažžut johtui barggu go lea dehálaš min álbmogii. Mis lea dat áddejupmi, kulturipmárdus ja mii dovdat daid ealáhusaid mat leat dáppe. Lea dehálaš oažžut diekkár bálvalusa mii lea heivehuvvon álbmogii nu bures go sáhttá, lohká Somby.
