-Almmuhus-
-Almmuhus-
OĐĐASAT – Geahččit ráhkásnuvvan Sara-bearrašii

– Geahččit ráhkásnuvvan Sara-bearrašii

-

-

Nu lohká NRK Sámi almmuhanredaktevra Pål Hivand «Giđđajohtin minuhtas minuhttii» TV-ráiddu birra. Iđđes lei románttalaš govva TV-šearpmas, Hivand lohká ahte fuomášupmi, mii bođii sosiála mediain dan maŋŋil, čájeha ahte álbmot ráhkásnuvai vel eambbo sidjiide.

NRK Sámi hilljánis-tv «Giđđajohtin minuhtas minuhttii» lea ožžon olu fuomášumi dan rájes go álggii mánnodaga.


INSTAGRAMA DIEVVAN: Bearjadaga ilbme olu govat Instagram govvajuogadansiidui, NRK Sámi sáddagis. Šearbmagovva

Dušše Instagram govvajuogadanmedias leat birrasii 550 gova merkejuvvon NRK fáddágilkoriin #nrkrein» (nrkboazu).
Bearjadaga iđđes bovttii goit ge TV-ráidu vel eanet fuomášumi. Siiddaisit Aslat Ante Sara čájehii iežas ráhkisvuođa eamidii Rávdná Biret Márjá Eira Sarai earenoamáš vugiin.
Go ledje biebmame ealu, de háddjii Sara fuođđariid vai šattai váibmu mas «R» bustávva vel siste.

 

– Ráhkásnuvvan Sara-bearrašii

Dat lea boktán sosiálamediaid, sihke Instagramas ja Facebookas leat olu govat das.
Nrk Sámi almmuhanredaktevrra Pål Hivand lohká ahte eai lean vuordán jur ná stuora beroštumi Norggas ja olles máilmmis dán TV-ráidui.

– Oaidnit sosiála mediain ahte álbmot lea measta ráhkásnuvvan Sara-bearrašii. Ledje ovdalaččas juo buorit sidjiide, muhto dat mii iđđes geavai, dagahii ahte álge vel eambbo liikot sidjiide, lohká son.

 

Bures vuostá váldojuvvon

– Jáhkán olbmot dál oidnet ahte sápmelaš ii leat dušše dakkár obbalaš doaba. Geahččit leat ožžon relašuvnna Sara-bearrašiin, ja bearaš lea «suddadan» gehččiid. Juohke olbmos leat juogalágan ovdagáttut, ležžet dal heajos dahje buorit ovdagáttut. Go TV-ráidu lea nu bures vuostá váldojuvvon, de čájeha ahte olbmot nagodit daid ovdagáttuid guođđit. Olbmot maid oidnet ahte boazodoallu lea garra bargu, ja ožžot ipmárdusa ahte ii leat buorre jus lea mohtorjohtolat dakkár guovllus gos ealut leat, erenoamážit giđđat, lohká Hivand.

 

– Lokte sámi kultuvrra

33 proseantta gehččiin leat olgoriikkas, stuorámus oassi Suomas ja Ruoŧas. Maiddái Amerihkás, Duiskkas, Vuolleriikkas, Slovenias ja Japánas leat olu geahččit.


MOVTTET: Rávdná Biret Márjá Eira Sara lei hui movttet TV-sáddagis. Šearbmagovva NRK Sámi sáddagis

– Lea leamaš hirbmat lihkku dálkkiin, ja mii leat ožžon olu fiinna govaid. Lea maid buorre go sámi musihkka dál loktejuvvo, mii oaidnit Twitteris ja neahttaságastallamis olbmot jearahit makkár lávlagat ain čuojahuvvojit. TV-ráidu lea bures ovddidan sámi kultuvrra juohke ládje, lohká Pål Hivand.

Rávdná Biret Márjá lei hui movttet TV-sáddagis, ja čilgii maŋŋil jearahallamis NRK:i ahte ledje hástaluvvon háddjet fuođđariid vai šaddá juogalágan govva.

-Almmuhus-