– Sápmi dárbbaša deaivvadandoaluid musihkkariidda gos sihke fuomášuvvojit ja loktejuvvojit sin barggut eará dássái. Sámi musihkkavahkku festivála ovttas ovttasbargoguimmiiguin lágidit ge dan várás Sámi Music Award mas lea oassin earret eará NRK Sámi jienasteapmi «Jagi buoremus lávlla».
– Sápmi dárbbaša deaivvadandoaluid musihkkariidda gos sihke fuomášuvvojit ja loktejuvvojit sin barggut eará dássái. Sámi musihkkavahkku festivála ovttas ovttasbargoguimmiiguin lágidit ge dan várás Sámi Music Award mas lea oassin earret eará NRK Sámi jienasteapmi «Jagi buoremus lávlla».
Sámi Music Award dilálašvuohta galgá leat Álttás guovvamánu viđát beaivvi. Álbmotjienasteami «Jagi buoremus lávlla», mas leat18 lávlaga man NRK Sápmi lea bidjan johtui, lea oassin dás.
– Dát lea ovttasbargu Sámi Music Awardiin. Doppe leat jerron mis searvat dasa. Mii leat mearridan ahte háliidit lágidit «Jagi buoremus lávlla», muitala NRK Sámi rádiosáttafuolaheaddji Kolbjørn Norvang.
NRK Sámi jury lea válljen «Jagi buoremus lávlla» jienasteapmái artisttaid. Jurys leat Kolbjørn Norvang, Tore Skoglund, Anne Marie Hætta ja Trine Ragnhild Boine.
– Mii fertiimet heivehit dán rádiosáddagii. Danin šattai listu mas leat 18 nama, vaikko mii diehtit ahte áigodagas leat 28 artistta almmuhan lávlagiid. Muhtin artisttat almmuhedje eambbo go ovtta lávlaga áigodagas.
Jienasteami njuolggadusaid mielde «Jagi buoremus lávlla» jienasteapmái nammaduvvo beare okta lávlla juohke sámi artisttas. Dasa lassin lávlla galgá almmuhuvvon dahje čuojahuvvon rádios áigodagas skábmamánu vuosttaš beaivvi 2014 rájes gitta skábmamánu vuosttaš beaivvi 2015 rádjái. Lávlagis galget leat maiddái «sámi elemeanttat». Jienasteapmi álggii ođđajagemánu 12. beaivvi ja loahpahuvvo dán mánu 24. beaivvi. Dasto Sámi Music Award doaluin vuoiti namma almmuhuvvo.
Ii dušše «Jagi buoremus lávlla»
Sámi Music Award lágideaddjit lohket ahte dát lea beare oassi dáhpáhusas.
– Dát man lágida NRK Sápmi lea beare oassi dahje beare okta nammadeapmi. Sámi Music Awardas oktiibuot leat golbma nammadeami dán háve, čilge Audioland fitnodaga beaivválaš jođiheaddji ja dáhpáhusa lágideaddji Olga Solyanik.
Lassin «Jagi buoremus lávlagii» leat vel guokte nammadeami, nu mo «Cross over» ja «Árbevirolaš máhttu». «Cross over» lea nammadeapmi mas válljejuvvo buoremus ođđaáigásaš musihkka. Nuppi nammadeamis válljejuvvo buoremus árbevirolaš vuohki dahje juoigan.
Fágaolbmot ja ovttasbargoguoimmit
«Cross over» ja «Árbevirolaš máhtu» vuitiid galget fágaolbmot válljet. Ovttasbargoguoimmit galget evttohit artisttaid nammademiide.
– Bargu lea jođus. Danin eat sáhte dadjat geat evttohit daid. Mii smiehtaimet ahte amma olbmot, geain lea gelbbolašvuohta musihkas, juoigamis, nu mo Sámi komponisttaid searvi ja Riddu-Riđđu festivála, álggos evttohit artistanamaid. Dasto geahččat evttohuvvon namaid fárrolaga. Maŋŋel de fágaolbmot válljejit nammademiid vuitiid.
Olga Solyanik sániid mielde dáin fágaolbmuin ja servviin dása lea doarvái gelbbolašvuođa.
Vuos prošeakta
Sámi musihkkavahkku lágidit Álttás guovvamánu 2. – 7 beivviid, Audioland nammasaš fitnodat lea doaluid váldolágideaddji ja lea Sámi Music Award lágideami fuomášeaddji.
– Mii leat jo 2014:s álgán dáinna bargat, muhto ruđalaš hástalusat bissehedje áigumušaid. Jotkkiimet dainna aŋkke maŋŋel bargat vaikko lea ge ain eahpečielga ruhtadilli, nu leat boahtán dáinna jahkái 2016, muitala Audioland fitnodaga beaivválaš jođiheaddji Olga Solyanik.
Sámi Music Award lágideddjiid oainnu mielde sin doalut galget leat «albma šovva» ja doarvái stuorrát.
– Dán jagi mii vuos geahččat mo lihkostuvvat, muhto sávvat ahte boahtte jagi Sámi Music Award vel eanet stuorru. Dat mii lea dehálaš lea ahte dát galgá šaddat ámmátmusihkkariidda arenan gos musihkkarat, buvttadeaddjit ja earát deaivvadit, muitala Olga Solyanik.
Sámi Music Award oaivvilduvvo sámi musihkkasuorggi arenan mas artisttat, juoigit ja buvttadeaddjit ožžot vejolašvuođa sihke loktet iežaset gealbbu ja ožžot fuomášumi čehppodagaset.
– Dát ii galgga leat beare fiinna konsearta, muhto ovdamearkka dihte fágalaš seminárat.
– Mii liikuimet eambbo nubbi lávlagii
Sameradion ja SVT Sámi “Hálgu” nammasaš rádioprográmma čađahii juovlamánus mannan jagi álbmotjienasteami «Jagi buoremus lávlla» man vuittii Sofia Jannok lávlagiin «Snölejoninna». Lávlla oaččui loahpajienasteamis 349 jiena. Oktiibuot jienastedje loahppajienasteamis 845 olbmo. Muhto NRK Sámi «Jagi buoremus lávlla» álbmotjienasteamis dát lávlla ii leat mielde.
– Mii (jury – Ávvir) smiehtaimet dán birra. Muhto liikuimet eambbo nuppi Sofia lávlagii. Min mielas «I ryggen på min Kolt» lea eambbo rádiolávlla, čilge NRK Sámi rádiosáttafuolaheaddji Kolbjørn Norvang.
NRK Sámi mielbargi dieđuid mielde juste ovdal go Ávvir jearahalai su jienastedje 200 olbmo. Son ii sáhte almmuhit favorihttanama. Dasa lassin lohká son ii sáhte namuhit makkár lávlaga livččii ieš jienastan go galgá leat neutrála.
Sámi musihkkavahkku festivála prográmma, man oassin lea Sámi Music Award, almmuhuvvo farggamusat, dieđihit lágideaddjit. Dál lágideaddjit dadjet Ávvirii ahte Sámi musihkkavahkku oktavuođas guossit besset vásihit earret eará Ronja Rievvárnieda mánáidteáhterbihtá, Katarina Baruk konseartta ja ollu eará.
