Álttájohka ráigge govddodii reive, man Martin ja Dagny Isaksen gávnnaiga. Soai sávvaba nieida guhte čálii reivve oaidná ahte soames lea gávdnan dan.
Álttájohka ráigge govddodii reive, man Martin ja Dagny Isaksen gávnnaiga. Soai sávvaba nieida guhte čálii reivve oaidná ahte soames lea gávdnan dan.
Áltálaš Martin Isaksen ja su eamit Dagny leigga gaskavahkku oaggume Álttájogas Battakorvas, go fuomášeigga bohtala mii bođii govddu johka ráigge.
Čájehuvvui bohtala siste lei reive, man muhtun nuorra nieida lei čállán. Reive álggahuvvo «Ráhkis áhčči», ja lea reive nieidda áhččerohkkái.
Dasto čuovvu teaksta dárogillii mas nieida čállá ahte lea fargga golbma jagi áigi go su áhčči jámii, ahte váillaha áhčis, ja áin sávvá ahte boađášii ruovttoluotta.
– Lei váivves ja fiinna reive, ja lea morrašis čállon. Jurddašin eat go son mii ábuhan lohkat reivve, vai lei go čállon danne vai muhtun gávdná ja lohká dan. Reivves ii čužžon dáhton, lohká Dagny Isaksen.
Sávvaba nieida oaidná soames lea gávdnan reivve
Martin Isaksen govvii reivve ja almmuhii dan Facebookii. Dainna jurdagiin ahte nieida oaidná reivve ja diehtá ahte lea gávdnon. Bohtal lei duolvvas ja orru guhka leamaš čázis. Soaitá giđđadulvvi mielde boahtán, dahje soaitá moadde beaivvi áigi bálkestuvvon johkii.
– Jurddašeimme ahte soaitá buorre niidii diehtit ahte soames lea gávdnan dan, dat soittii su jurdda, muitala Dagny Isaksen.
– Sávan ahte lea dorvun sutnje diehtit ahte bohtal lea gávdnon. Lei bures čállon, ja danne maid almmuheimme gova. Moai letne eallilan olbmot ja dihte moraš čuovvu olles eallima. Dá lei váivves reive muhto liikká lei buorre lohkat dan, lohká Martin.
Jorgalahttán sámegielat osiid reivves
Soai eaba máhte sámegiela, muhto leaba sámegielat olbmáin gullan mii čuožžu sámegielat osiin reivves. Soai beasaige de diehtit ahte lea dan dievddu nuoramus nieida mii lea čállán reivve. Sudno sámi olbmát leat maid kommenteren Facebookas.
– Soaitá buorre dan niidii diehtit ahte olbmot beroštit, lohkába soai.
Olles reive:
«Ráhkis áhčči.
Dál lea fargga golbma jagi áigi go guđđet min. Dan beaivvi in vajálduhtte goasse. Movt dan galggašin?
Dat lei/lea buot vearrámus beaivi mu 20 jagi guhku eallimis. Jurddašan du birra juohke beaivvi ja lea lihka bávččas juohke beaivvi. Mun jurddašan ja sávan áin ahte ovtta beaivvi boađát fas min lusa, mu lusa, muhto lea vissa áigi ipmirdit ahte mu sáŋgár ii šat boađe. Ii goit dán eallinagis.
Moai soite fas deaivvadit ja mun beasan lohkat visot maid in beassan. Visot maid in duostan lohkat. Ahte viimmat oaččut dan maid ánssášat ja vel eambbo. Lean agibeaivái giitevaš dan áiggis mii munnos lei vaikko lei beare oanehaš.
Áiggun geahččalit buoridit min bearraša eallima du dihtii. Sávan dus lea buorre doppe gos leat.
Maŋemuš dearvvuođat du nuoramus nieiddas.»
