Čieža kandidáhta leat válljejuvvon leat mielde NRK Sámi taleantaprográmmas.
Kandidáhtat leat buohkat gaskal 18 ja 25 jagi boarrásat, ja oktiibuot ovddastit sii sihke geográfalaš ja gielalaš valljivuođa. Go almmuhedje prográmma cuoŋománus, de ledje guhtta saji. Preassadieđáhusas čuožžu ahte go ledje nu buorit ohccit, de viiddidedje ovttain sajiin.
Prográmma ovddasvástideaddji, Mona Solbakk, lea hui duhtavaš go leat ožžon oasseváldiid iešguđet sámi gielladuogážiin.
– Min áigumuš lea buoridit ja lasihit fálaldaga julev- ja máttasámegielaide. Danin lea dehálaš midjiide ahte mis leat čeahpes julev- ja máttasámegielat journalisttat geat máhttet ráhkadit sihke ođđasiid ja guoimmuheaddji sisdoalu mánáide, nuoraide ja ollesolbmuide, lohká Solbakk.
