Odne čiekčá Tromsø IL Strømsgodset vuostá, ja hárjeheaddji lohpida ahte Gamsten beassá maid čiekčat.
Romssa hárjeheaddji Bård Flovik lohpida ahte Morten Gamst Pedersen beassá odne čiekčat su vuosttaš čiekčama dán jagi.
– Mun lean oalle sihkar ahte Gamsten beassá nahkehit TIL-báiddi odne badjelii. Beassá go son álggu rájes čiekčat vai maŋŋelaš boahtit sisa, lea váttis dadjat, muhto mus lea stuora jáhkku ahte son beassá čiekčat, lohká son til.no neahttasiidui.
Garra gilvu
Dál leat buohkat dearvvašnuvvan ja lea stuora gilvu das gii beassá čiekčat.
– Aron Sigurdason lea hárjehallan dál ja das mii oaidnit gierddai go son dan. Buot deháleamos lea gávdnat dan 11 čiekči geat buoremusat heivejit oktii go galgat Strømsgodset vuostá čiekčat. Lea garra gilvu, ja hárjehallamis addet buohkat buot návccaid ja mis leat olbmot geat leat veahkkin sihke ovdal čiekčama ja čiekčamis, lohká TIL váldohárjeheaddji Flovik.
Njunuš čiekčanjoavku
Otná čiekčan lea njealját čiekčan dán jagi, ja Romsa lea golmma geardde čiekčan dássálaga golmmain joavkkuin, namalassii Molde, Start ja Odd.
– Mii vuordit ahte Godset boahtá Romsii vuoitit, ja dat lea joavku mii háliida leahkit njunnošis ligas, ja mii ipmirdit ahte mii vuot deaivvadit buriin čiekčanjoavkkuin, muhto mii han galgat ruovttušiljus čiekčat, lohká Bård Flovik.
Tromsø IL-Strømsgodset álgá diibmu 18:00.
