Sámedikki dievasčoahkkima ođđa áššiid dieđiheami oktavuođás evttoha Beaska Niillas ahte galggašii beassat gulahallat sámegillii stáhta ásahusaiguin.
– Sámegiela geavaheapmi lea olmmošvuoigatvuohta ja maiddái eaktun sámegiela ovdáneapmái ja seailluheapmái. Danin ferte leat sihke lunddolaš ja vejolaš doaimmahit ja doaibmat servodagas maiddái sámegillii, čállá Beaska Niillas evttohusas.
Juohke searvi, ásahus, fitnodat, vuođđudus ja nu ain Norgga beale Sámis galgá dieđihit Brønnøysundregistarii dihto dieđuid jus dáhttu dan registarii registrerejuvvot. Dan láhkai lea Brønnøysund stuorra ja fámolaš ásahus mii guoskkaha masá buot servodatdoaimmaid, maiddái Sámi servodaga. Dál ii leat vejolaš registtardieđuid almmuhit sámegillii go sii gáibidit dárogillii buot dieđuid, muđui eai meannut dieđuid, ođastemiid ja áššiid.
– Sámediggi bivdá Brønnøysundregistara sin doaimmas váldit vuhtii sámegielagiid seamma dásis go dárogielagiid ja láhčit dili dásseárvosašvuhtii min álbmogiid gaskkas, evttoha NSR-áirras.
