Omasvuonas lea okta nisu gahččan jiehkis vulos. Nisu lea dál sáddejuvvon Sea-King helikoptera mielde buohccivissui Romsii.
Okta nisu lea gahččan jiehkis vulos Riehppegáissas lulábealde Ivgováriid, Omasvuonas, dán dieđiha Romssa politiijaguovlu twitteris.
Politiijat ožžo dieđu dáhpáhusa birra sullii diibmu 10:00 duorastaga ovdalgaskabeaivvi.
— Mii eat dieđe movt nisu lea roasmmohuvvon. Muhto go lea hupmu ahte lea gahččan, de oažžu jurddahit ahte lea roasmmohuvvon bahuid, lohká operašuvdnajođiheaddji Øyvind Gundersen Romssa politiijaguovllus NRK:ii.
Sáddejuvvon buohccivissui
Ambulánsahelikopter ja Sea-King joavddaiga báikái diibmu 10:50.
— Nisu lea roasmmohuvvon, son lea sáddejuvvon Sea-King helikoptera mielde Davvi-Norgga universitehtabuohcciviissui, dieđiiha Romssa politiijaguovlu twitteris.
Riehppegáisa gos nisu lea gahččan lea 1493 mehtera badjel meara, muhto dat ii leat čielggaduvvon gos nisu lea gahččan vulos.