Tromssa ja Finnmárkku ovddasteaddjit deaivvadedje gaskavahkku eahkes Gardermoenis. Sii galget geahččalit čoavdit riiddu mii lea čuožžilan fylkkaid ovttasteamis.
Tromssa ja Finnmárkku ovddasteaddjit deaivvadedje gaskavahkku eahkes Gardermoenis. Sii galget geahččalit čoavdit riiddu mii lea čuožžilan fylkkaid ovttasteamis.
Knut Storberget (Bargiidbellodat) nammaduvvui bearjadaga soabaheaddjin. Son lea gulahallan beliiguin vahkkoloahpas.
– Lea gáibideaddji bargu, muhto mun lean optimisttalaš, logai Storberget NTB ođasfitnodahkii ovdalaš soabadallamat álge.
Norgga guokte davimus fylkka eai leat soabadan oktiičaskimis, ja guokte vahkku áigi boatkanedje šiehtadallamat go Tromssa-áirasat guđđe čoahkkima.
Duorastaga, vahkku áigi, deaivvadedje bealit gielddaministara Monica Mæland (Olgeš) luhtte.
– Beare árrat
–Mii leat olu bargan juo, ja mu mielas leat bealit konstruktiivvalaččat, lohká Storberget.
Soabadallamat álge gaskavahkku eahkes diibmu gávccis, ja bistet duorastahkii diibmu njealji rádjái.
– Lea vuos beare árrat lohkat lea go de ášši čovdon. Bealit fertejit oažžut dan áiggi maid dárbbašit, lohká Storberget.
Okta áššiin mas eai soabat, lea galgá go oktasaš lávdegoddi nammaduvvot. Dat lávdegoddi galggašii mearridit ođđa fylkka organisašuvdnakártta ja politihkalaš stivrenvuogi. Ja maid mearridit gos regiovdna oaivegávpot galgá. Dál leat guokte fylkkahálddahusa, Čáhcesullos ja Tromssas.
– Čielggas ahte lea sáhka dehálaš bargosajiin sihke Tromssas ja Finnmárkkus, lohká Storberget.
Sáhttet botket
Jus bealit eai boađe ovtta oaivilii, ja šiehtadallamat fas boatkanit, de šaddá Gielddadepartemeantta bargu nammadit oktasaš lávdegotti.
– Dalle ii leat fylkkain vejolašvuohta ieža stivret dán. Muhto lea sihke viissis ja dehálaš ahte báikkálaččat mearridit eanas áššiid, lohká Storberget.
Guokte fylkka maid eai leat ovtta oaivilis makkár namma ođđa fylkkas galgá, Tromsa ja Finnmárku vai Finnmárku ja Tromsa. Dan mearrida Stuoradiggi loahpalaččat.
(©NTB)
