Fargga 10 000 bohcco oastán Finnmárkku boazosápmelaččain muitala ahte «Min Boazu» biergooastinfitnodat lea sukseassa. Dan sii čalmmustahttet vel buoret biergokilohattiin boazoeaiggádii, ja maid vuorbádit skohtera sin gaskkas geat leat čorraga sidjiide vuovdán.
– Mii leat nu giitevaččat go boazosápmelaččat leat čájehan midjiide luohttevašvuođa ja vuovdán midjiide gávpečorragiid, ahte mii áigut addit sidjiide juoidá ruovttoluotta, čilge Min Boazu fitnodaga doaibmajođiheaddji, Johan Samuel Nedrejord, Ávvirii ággan manin dákkár kampánjja leat bidjan johtui.
Lahka 10 000 njuovvan
Nedrejord muitala ahte sii leat fargga 10 000 bohcco oastán boazosápmelaččain, ja lea bures mannan singuin, dan vuohttá das.
Son muitala maid čáhppesbearjadatkámpanja mielddisbuktá:
– Mii fállat historjjálaš buriid hattiid bohccobierggus boazosápmelažžii, mii loktet hatti ja sáhttá gitta 100 ruvnno oažžut biergokilos, ja vel vuorbádit áibbas ođđa skohtera, Ski-Doo 600 Ace, mas lea árvu badjel 110 000 ruvnno.
– Dan mii vuorbádit sin gaskkas geat dušše midjiide leat vuovdán gávpečorraga, muitala son.
Kampánija njuolggadusat
Kampánjja áigodat bistá skábmamánu 23. beaivvis, diibmu 23:59, gitta skábmamánu 25. beaivái, diibmu 23:59.
Gii dan áigodagas dahká šiehtadusa vuovdit gávpečorraga Min Boazu fitnodahkii, son oliha kampánjahattiid bierggus, mii lea gitta 100 ruvnno biergokilos.
– Gávpečorraga sáhttá geassit vaikke goas dán njuovahanáigodagas, vaikke vel guovvamánus, ja liikká oažžu de daid historjjálaš buriid hattiid gávpečorragis, beare dan šiehtadusa dahká dán guovtti beaivvis, muitala Nedrejord.
(Ášši joatká gova vulobealde)
Govven: Anne Rasmus
Skohter vuoittit
Dasa lassin vel vuorbádit sii skohtera sin gaskkas geat leat gávpečorraga vuovdán Min Boazu fitnodahkii.
– Dat vuorbáduvvo sin gaskkas geat leat midjiide gávpečorraga vuovdán čavčča rájes ja dassážii go njuovahanáigodat nohká giđasdálvve boahtte jagi, muhto galgá dušše midjiide vuovdán čorraga, muitala Nedrejord.
Jus oasi gávpečorragis lea didjiide vuovdán, ja nuppi oasi eará biergooastái, lea go de šat mielde skohtervuorbádeamis?
– Jus soames bohcco, mii nuppi siiddas lea leamaš, vuovdá eará biergooastái, dat gal vel dohkke. Muhto dihtomielalaččat oasi čorragis vuovdán eará biergooastái, de ii leat šat mielde skohtervuorbádeamis, muitala Johan Samuel Nedrejord Ávvirii.
