-Almmuhus-
-Almmuhus-
OĐĐASATFierbmebivddu oktavuođas leamaš lobihisvuođat

Fierbmebivddu oktavuođas leamaš lobihisvuođat

-

-

Luossabivdu lea juo bistán badjelaš mánu ja leat juo leamaš veaháš lobihisvuođat dan oktavuođas.

Tonje Halvari guhte lea Deanočázádaga guolástanhálddahusas guolástanbearráigeahčču hoavda Deanus ja Kárášjogas, duođašta ahte leat leamaš moadde ášši dán jagi gos guolásteaddjit leat geavahan lobihis árppu firpmiin. 

Halvari goitge dadjá ahte son jáhkká ahte eatnasat leat čeahpit čuovvut njuolggadusaid. 

 

Ávžžuha geahčadit njuolggadusaid

Seammás ávžžuha guolásteddjiid geahčadit buot njuolggadusaid:

– Erenomážit guolásteaddjit geat eai ása Kárášjoga dahje Deanu gielddas galggašit oahppat njuolggadusaid ja mannat daid čađa, muitala Halvari.

 

Moadde ášši dán rádjai

Narve Stubbraaten Johansen guhte lea ráđđeaddi Deanočázádaga guolástanhálddahusas dadjá gal ahte leat leamaš moadde ášši gos guolásteaddjit leat lobihuššan.

– Dat leat leamaš moadde ášši dán jagi gos leat geavahuvvon fierpmit mat lea čiktojuvvon lobihis árppuin.

Deanočázádaga guolástanhálddahusa ráđđeaddi Narve Stubbraaten Johansen dadjá ahte oppalaččat dán jagi eai leat leamaš nu ollu lobihisvuođat.

 

Ii leat lohpi geavahit buotlágan árppuid sáimmain

Muhttin árppuid lea lohpi geavahit firpmiin.

– Multimonofila-árppuid ii leat ovdamearkka dihte lohpi geavahit firpmiin, čilge Johansen.

Johansen ávžžuha sin geat bivdet firpmiin, dárkkistit ahte leat lobálaš árpput njuolggadusaid ektui.

Dasalassin dadjá Johansen ahte olbmot leat čeahpi cavgilit jus dihtet ahte olbmot leat lobihuššamin.

Ođas dán jagi lea maid ahte Stáhta luonddubearráigeahčču lea eambbo bearráigeahččan rádjaguovllu dán jagi.

– Sivva dasa lea ahte mii leat ožžon juolludeami Stáhtabušeahtas dasa, muitala Johansen.

 

 

 

 

 

-Almmuhus-