Kárášjohkalaš Nijlas I. J. Eira fertii gávdnat ođđa valáštallansuorggi mas beassá gilvalit, maŋŋel go gorut ii šat nákcen spábbačiekčama. Dál duolmmasta vuosttaš háve of300 gilvui.
Kárášjohkalaš Nijlas I. J. Eira fertii gávdnat ođđa valáštallansuorggi mas beassá gilvalit, maŋŋel go gorut ii šat nákcen spábbačiekčama. Dál duolmmasta vuosttaš háve of300 gilvui.
Lea vuollel njeallje diimmu dassá go of300 vuolgga duolmmastuvvo johtui ja Kárášjohkalaš Nijlas I. J. Eira ja su gilvoguoibmi leavdnjalaš Ole Heljar Smelror (Team 355), čuožžuba vuosttaš háve vuolggasárgás.
Fertii geahpedit
Kárášjohkalaš Nijlas I. J. Eira, gii orru Tromssas, muitala iežas šaddan lonuhit valáštallansuorggi maŋŋel go su gorut ii šat gierdan spábbačiekčama.
Dál ii čievčča šat makkárge searvvi ovddas.
– Mun lean gal sihkkelasttán dan rájes go ledjen unni, muhto gilvalit álgen easka diibmá. Fertejin álgit lihkadit maŋŋel go geahpedin spábbačiekčama ja meahccesihkkelastin orui hui somá, muitala son.
Son muitala iežas roasmmohuvvan jámma čiekčamis, geavahii ollu áiggi dearvvašmuvvat juohke háve ja danin fertii geahpedit.
– Sihkkelastin lea somá ja go beasan gilvalit. Dán jagi heivii oasálastit Offroad gilvvuide, go mus leamaš jo guhká miella dan geahččalit, čilge Eira.
Hárjehallan bures
Kárášjohkalaš muitala iežas hárjehallan bures ovttas iežas gilvoguimmiin dálvvi rájes Tromssas.
Iežas lohká muhtin muddui bures ráhkkanan, muhto lei dieđus sávvat sáhttit veahá vel buorebut ráhkkanit.
– Dál goittot ledne veahá buohcan maŋimuš mánu, eange leat beassan nu bures hárjehallat, muitala son.
Diibmá oasálasttii Eira golmma gilvui geahččalan dihte; Skaidi Xtreme gilvvuide, Lavkarittet gilvvuide, ja Savkadasrittet gilvvuide.
– Diibmá in lean nu ollu hárjehallan sihkkelin ja gávnnahin ahte die lea juoga mainna háliidan joatkit, dovddasta son.
Ii baldde
Gilvvu čađaheapmi lea gal deháleamos mihttu, muhto kárášjohkalaš lohká sávvat sudno nagodit duolbmut gilvvu vuollel 30 diimmus
Son lohká gullan stánžžiid birra, muhto ii loga heajos gilvomađiija baldit sudno.
– Mun in leat dan birra jurddašan nu ollu. Moai finaime duvle geahččaleamen mađiija ja dalle lei vel vearrát arvi ja dušše golbma lieggaceahkki. Dálhan lea 10 gráda lieggaset go dalle, nu ahte moai dihte mo dat lea ja ledne ráhkkanan dan vearrámussii, dovddasta son.
Nijlas I. J. Eira lohká dán gilvvu buorre geahččaleapmin iežas rájáide, go ii leat dat fiidnámus dálki dahje goike bálgát. Son lohká liikot garra hástalusaide.
