Jus gottit guđđet Nordfjellaguovllu gos CWD-dávda lea gávdnon, de oažžu daid gavdnjet ruovttoluotta dahje báhčit, dieđiha Birasdirektoráhtta.
Eiseválddit addet lobi báhčit gottiid mat guđđet guovllu gos sarvaelliid njoammudávda lea. Buot gottiin sáhttá leat CWD njoammudávda Buskerud fylkkas, riikkageainnu 52 ja fylkkageainnu 50 gaskkas, Hemsedalváris. Nuppe bealde riikkageainnu lea boazodoallu.
Sihke guođoheaddjit ja vávttat galget veahkkin váruhit vai eai ribat bohccuid mastadit gottiiguin.
– Vai dávda ii leava viidáset, de lea Birasdirektoráhtta addán lobi gavdnjet dahje báhčit daid gottiid mat rasttildit luotta, muitala Biebmobearráigeahču seniorráđeaddi Kristin Ruud Alvseike.
Norgga gottiid lohku lea bisson dássedin maŋemus logi jagi, muhto máilmmis muđuid lea nálli áitojuvvon. Gottit leat ráfáidahtton eallit. (©NTB)
