Kárášjohka-raporta lea dušše juridihka birra:
KRONIHKKA: FeFo:s ii leat eará áigumuš go ahte riekta galgá šaddat riekta.
FeFo hálddaša bivddu, guolásteami ja opmodagaid Finnmárkkuopmodagas. Mii leat Finnmárkolága boađus. 34. paragráfas daddjo ahte FeFo galgá buktit oaivila Finnmárkokommišuvnna raporttaid sisdollui. Dan dagaimet Stiertná/Sievjju, Unjárgga, Sállana ja Várnjárgga nuortta ja oarjji dáfus. Dál dahkat dan Kárášjoga 4. guovllu dáfus.
Leat leamaš garra digaštallamat dan rájes go ovddideimmet iežamet gulaskuddancealkámuša Kárášjohka-raportta birra ja sáddiimet dan gulaskuddamii, nu go leat dahkan buot raporttaid dáfus ovdal. Olu buorit bealit leat loktejuvvon ja digaštallojuvvon, muhto juoidá ferte cakkadit – earret eará sátnejođiheaddji Svein Atle Somby čuoččuhusa NRK Sámis 15.10.2020 ahte «FeFo ii gáro luoitit Kárášjoga». Duogáš lea ahte Finnmárkokommišuvnna eanetlohku lea cealkán ahte gieldda ássit oamastit sin iežaset meahci. FeFo oaivvilda ahte lea stuora eahpesihkarvuohta dan loahppacealkámuša hárrái man golmmas lávdegotti viđa lahtus dorjo ja guovttis fas hilgo. Danne mii eat leat ávžžuhan dohkkehit kommišuvnna eanetlogu cealkámuša. Dás ii leat mihkkege dahkamušaid dainna ahte gárrut go luoitit Kárášjoga vai eat. Lea sáhka das ahte riekta galgá leat riekta. Mii cealkit muđui čielgasit iežamet gulaskuddancealkámušas ahte FeFo:s ii leat vuosteháhku sirdit opmodaga FeFos ođđa eananeaiggádii Kárášjogas.
Dás ii leat mihkkege dahkamušaid dainna ahte gárrut go luoitit Kárášjoga vai eat. Lea sáhka das ahte riekta galgá leat riekta.
Okta eará čuoččuhus lea ahte FeFos leat ekonomalaš motiivvat iežamet loahppacealkámuša duohken. NRK Sámis 8.11.2020 daddjo ahte «FeFo sáhttá manahit máŋga miljovnna ruvnno jahkásaččat jus masset Kárášjoga». Man muddui FeFo sáhttá manahit máŋga miljovnna ruvnno jus Kárášjohka váldojuvvo eret Finnmárkolága hálddašanguovllus, dan ii leat FeFo guorahallan ovdal go NRK bivddii mis dakkár loguid Kárášjoga, Guovdageainnu ja Deanu dáfus. Dalle guorahalaimet loguid mat čájehit ahte Kárášjoga dietnasat dahket sullii seamma mađe go gieldda hálddašeami golut. FeFos ii leat ovdal leamaš dárbu meroštallat dáid beliid, danne go ekonomiija ii leat relevánta min árvvoštallamiidda. Dál, go lea dahkkon, de soaitá leat miellagiddevaš soapmásiidda diehtit ahte golbma dain áigeguovdilis hálddašanguovlluin mat dáidet leat eanemus guovddážis jus kommišuvnna loahppacealkámušaid juridihkalaš vuođđu lea doallevaš (Kárášjohka, Guovdageaidnu ja Badje-Deatnu), háhket dietnasiid gaskal logi-oktanuppelohkái miljovnna ovddas. Man muddui dát lea buorre ekonomalaš vuođđu báikkálaš hálddašeapmái, dasa eai leat FeFos oaivilat.
Loahpas háliidan vel deattuhit ahte FeFo lea ovttaoaivilis dainna maid eanas digaštallit deattuhit – namalassii ahte dat maid stáhta dagai sámi álbmoga vuostá lei dohkkemeahttun ja ahte stáhta oamastangáibádus Finnmárkku eatnamiid ja čáziid dáfus lei eahpevuoiggalaš. Finnmárkoláhka lea dovddasteapmin dasa, ja danne leat Finnmárkku eatnamat dál sápmelaččaid ja eará finnmárkulaččaid oktasaš opmodat.
FeFo lea ovttaoaivilis dainna maid eanas digaštallit deattuhit – namalassii ahte dat maid stáhta dagai sámi álbmoga vuostá lei dohkkemeahttun ja ahte stáhta oamastangáibádus Finnmárkku eatnamiid ja čáziid dáfus lei eahpevuoiggalaš.
Dat mii dál lea dehálaš, lea ahte FeFo ii sáhte garvit bargamis dan mii lea min bargu, namalassii buktit oaivila Finnmárkokommišuvnna raporttaide ja muitalit maid mii oaivvildit juridihkalaččat, duohtadilis ja historjjálaččat sisdoalu birra. Seamma ládje go kommišuvnnas, de lea maiddái mis gártagoahtán olu hárjáneapmi das. Dat lea givrodahkan dasa ahte riekta šaddá riekta loahpaloahpas.
Dat lea givrodahkan dasa ahte riekta šaddá riekta loahpaloahpas.
Čállán: Jan Olli, FeFo direktevra
