FeFo direktevra oaidná Nussir-ruvkkes buriid beliid. Danne lea evttohan stivrii, ahte Finnmárkkuopmodat (FeFo) dohkkeha Nussira doaibmakonsešuvdnaohcama.
FeFo direktevra oaidná Nussir-ruvkkes buriid beliid. Danne lea evttohan stivrii, ahte Finnmárkkuopmodat (FeFo) dohkkeha Nussira doaibmakonsešuvdnaohcama.
Nussir ASA ozai miessemánu 6. beaivvi 2017:s Mineráladirektoráhtas doaibmakonsešuvnna minerálalága mielde roggat veaikki Nussiris ja Gumpenjunis Fálesnuori gielddas. Direktoráhtta sáddii ohcama gulaskuddamii geassemánu 21. beaivvi. FeFo lea ožžon áigemeari buktit cealkámuša gulaskuddamii maŋiduvvot čakčamánu 22. beaivái.
Geatnegahtton árvvoštallat
Finnmárkkuopmodat lea okta olu gulaskuddanoasálaččain, ja lea geatnegahtton árvvoštallat doaibmabiju Finnmárkkulága ulbmila mielde, earenoamážit go guoská sámi kultuvrii, boazodollui, meahccegeavaheapmái, ealáhusdoibmii ja ássamii, ja siskkobealde rámmaid maid láhka addá FeFoi eananeaiggádin.
Direktevra oaivvilda doaibmabiju buktit positiivvalaš ovdáneami
Direktevra lea odne, maŋŋel go lea geahččan ášši dárkilit, addán mearrádusevttohusa stivrii. Obbalašárvvoštallama maŋŋel lea direktevra konkluderen ahte doaibmabidju buvttiha positiivvalaš servodatovdáneami, mii fas sáhttá lea vuođđun sámi beroštumiid áimmahuššamii go ássan lassána marginaliserejuvvon mearrasámi guovlluin.
– Deaŧalaš eaktun lea ahte doaibmabiddji ovttas boazoealáhusain gávnnahit duhtadeaddji, buhtadeaddji doaimmaid, nu go Gielda- ja ođasmahttindepartemeanta lea nannen regulerenplána loahpalaš dohkkeheamis, dadjá direktevra Jan Olli preassadieđáhusas.
Fálesnuorri galgá sihkkarastit sámi vuoigatvuođaid áimmahuššama
Dasa lassin bivdá FeFo ahte biddjo eaktun vejolaš lobis ahte doaibmabiddji dahká šiehtadusa gielddain mii sihkkarastá sávvon servodatovdáneami ja ahte áimmahuššet sámi vuoigatvuođaid ja beroštumiid. Gulaskuddancealkámuš meannuduvvo stivračoahkkimis čakčamánu 19. beaivvi. Ášši biddjo ovdan «meahccegeavaheami earáhuhttináššin» Finnmárkkulága § 10 mielde ja Sámedikki meahccegeavaheami earáhuhttima njuolggadusaid mielde.
Dán dieđiha FeFo preassadieđáhusas.
Ávvir čuovvola ášši.
