Feasttat ja rikkearat

ÁLTÁ

Álttá politiijat šadde mannan ija máŋgga dálus fitnat jaskkodahttimin feastariejaid, maŋŋá go olbmot ledje váidalan.

Muhtin almmái 30 jagiin biddjui giddagassii go lei muosehuhttán oagguid muhtin oaggunbáikkis Álttá jogas. Politiijat váidet ášši.

Álttá gávpotguovddážis ledje fas muhtimat doarrán. Almmái 30 jagiin biddjui giddagassii ja váidojuvvo. Ii oktage roasmmohuvvan doarrumiin.

Álttá hoteallas lei maid muhtin almmái 30 jagiin rikkeren. Politiijat šadde su viežžat ja bidjat giddagassii.

MÁZE

Mannan ija ledje gulut buollán Mázes. 10 kvm sturrosaš oassi eatnamis bulii, Buollinčáskadeaddjit fitne báikkis čáskkadeamen dola. Buollimii eai dieđe siva.

HÁMMÁRFEASTA

Politiijat ožžo váidaga ahte muhtin dálus lei feastariedja. Politiijat leat fitnan báikkis dáhttumin jaskkodit.

Lávželuovttas maid dieđihuvvui leat feastariedja muhtin dálus gosa politiijat šadde mannat jaskkodahttit.

ÁVANUORRI

Ávanuoris lei muhtin almmái 30 jagiin rikkeren muhtin almmolaš doaluin. Almmái biddjui eret doaluin.

ČÁHCESUOLU

Čáhcesullos leat muhtimat fitnan ja bilidan ovtta visti mii čuožžu guorusin. Ášši váidojuvvo. 

PORSÁŊGU

Leavnnjas lei promilladárkkisteapmi mannan ija. Politiijat bissehedje 18 vuoddji, ii ovttasge lean promilla.

BIERGI

Politiijat fitne Bierggis muhtin dálus gos ledje doalut, jaskkodahttimin riejaid.

GIRKONJÁRGA

Muhtin almmái vižžojuvvui politiijaid háldui go lei badjelmeare juhkan.

Mannan ija lei maid rikkeara Girkonjárggas. 4 albmá gohččojuvvo eret gávpotguovddážis ja galge doppe doallat eret gitta 10 rádjái iđđedii.

BEARRALVÁGGI

Almmái 40 jagiin lea áššáskuhtton vuodján juhkanvuođas maŋŋá go vujii čuovgastolpui Bearralvágis. Ii oktage roasmmohuvvan lihkohisvuođas.

Loga maid dáid áššiid:

https://avvir.no/2018/06/doarrumat-guovdageainnus

https://avvir.no/2018/06/biilalihkohisvuohta-muosahis