Politiijain lea leamaš ollu bargu mannan ija stuorimus báikkiin Finnmárkkus.
Politiijain lea leamaš ollu bargu mannan ija stuorimus báikkiin Finnmárkkus.
Hámmárfeasta
Politiijat dieđihit twitteris allajienat musihka Hámmárfeastta guovddážis ja leat sihtan vuolidit jiena. Maŋŋelaš gávdne politiijat dievddu gii gárrenoaivvis lei vázzime Storsvingenis Hámmárfeasttas. Son ii bisson rievttes bealde luotta ja váccii gasku luotta.
Áltá
Muđui leat politiijat šaddan rigeremiid hehttet. Muhtin olgobáikkis Álttás lei dieđihuvvon hirbmat riedja ja politiijat fitne doppe.
Maŋŋelaš bođi diehtu ahte guokte dievddu leigga doarrán olggobealde City Scene báikki ja uksavávttat ledje šaddan mannat gaskii. Dievddu guovttos šattaiga guođđit guovddáš báikki ja ášši ceggejuvvo politiijaid bealis.
Áronjárggas ferteje politiijat sihtat vuolidit jiena go čuojahedje musihka beare garrasit. Guovddáš báikkis lei maid alladit musihkka maid ferteje sihtat vuolidit.
Joganjálmmis Álttás ledje muhtimat doarrán ja okta huškkohalai geđggiin oaivái ja varddii. Su dolvo doaktára lusa ja nuppi dievddu válde gitta.
Čáhcesuolu
Čáhcesullos bođii diehtu politiijai dievddu birra gii lei veahkaválddálaš gárrenoaivvis. Politiijat válde dan 30-jahkasaš dievddu gitta ja bidje giddagassii. Dievdu áššáiduhtto go lea rigeren, dorron, áitán ja billistan biergasiid. Politiijat dutket ášši viidáset.
Girkonjárga
Gaskaijaáigge šadde sáddet 19-jahkasaš dievddu eret Girkonjárgga guovddážis go lei diggon olgobáikki vávttaiguin.
Muđui dolvo politiijat 18-jahkásaš russa ruoktot go lei bearehaga juhkan.
Maŋŋel diibmu guovtti manna ija šadde politiijat sihtat guokte mearraolbmá (22 ja 24) guođđit guovddášbáikki go rigeriiga.
Dasto njuolga maŋŋelaš eai lean šat sihke ruoššat ja norgalaččat buoremielas, ja politiijat sihte sin guođđit guovddáš báikki.
Politiijat ožžo dieđu ahte muhtin lei gárrenoaivvis vuodjime mopedain, muhto eai gávdnan su go ohce.
