Politiijat dieđihit Twitteris ahte sis lei ollu bargu Álttás mannan ija.
Sullii gaskaija áiggi dieđihedje politiijat ahte sii leat dárkkistan leavttu johtolagas. Báikkis gos johtolatdárkkisteapmi lei, lea alimus leahttomearri 50 km/d. Čieža biilavuoddji sáhkkohalle ja alimus mihtiduvvon leahttu lei 59 km/d.
Suhttan olbmot
Sullii diibmu njealjis dieđihedje politiijat ahte sii gávdne guokte badjel 20-jahkásaš dievddu geat leigga gárremiin ja suhtan nubbi nubbái. Goappašagat oaččuiga dieđu guođđit Álttá gávpotguovddáža.
Bissehedje feasta
Sullii diibmu guđas iđđes bissehedje politiijat feasta muhtin priváhta ásodagas. Sii ledje ožžon dieđu ahte musihkka čuojahuvvo jitnosit ásodagas.
