Ivgumuotkilaš Trond Arne Hoe lea ovttajienalaččat evttohuvvon Gáivuona ođđa suohkandirektevran.
Maŋŋel go Gáivuona ovddit suohkandirektevra Einar Pedersen dieđihii guovvamánu ahte son luohpá virggis, de álggahuvvui bargu gávdnat ođđa. Dál dieđiha Gáivuona suohkan preassadieđáhusas ahte virgádanlávdegoddi lea ovttajienalaččat evttohan Trond Arne Hoe. Evttohus mearriduvvo suohkanstivrras geassemánu 18. beaivvi.
Hoe lea Omasvuona suohkana biras-, plána- ja doaibmaossodaga suohkanjođiheaddji . Son lea doppe bargan 2014 rájes. Muhtin áigodagaid lea maid bargan doaibmi ráđđeolbmán, dieđiha Gáivuona suohkan preassadieđáhusas.
