Dievasčoahkkinjođihangoddi lea árvvoštallan sámediggeválggaid praktihkalaš čađaheami ja oaidná buoridanmuni máŋgga suorggis. Deháleamos doaibmabidju man dievasčoahkkinjođihangoddi oaidná lea, ahte Sámediggái addojuvvojit doarvái resurssat čađahit válggaid.
Sámedikki dievasčoahkkinjođihangoddi lea geahčadan 2021 válgačađaheami. Dievasčoahkkinjođihangoddái, ja Sámediggái, lea dehálaš, ahte lea stuorra luohttevašvuohta válggaide ja daid čađaheapmái. Árvvoštallamis lea dievasčoahkkinjođihangoddi geahččan 2021 válggaid praktihkalaš čađaheami, iige leat geahčadan sámediggeválggaid prinsihpalaš beliid.
– Sámediggeválggat 2021:s leat čađahuvvon láhkaásahusaid vuođul, iige leat eahpádus ahte válgabohtosat eai livčče riekta. Mii oaidnit ahte Sámediggi liikká sáhttá buoridit sámediggeválggaid čađaheami, ja dievasčoahkkinjođihangoddi lea dál evttohan maid beliid sáhttá buoridit, dadjá dievasčoahkkinjođiheaddji Tom Sottinen (Bb).
Doaibmabijut
Árvvoštallama oktavuođas lea dievasčoahkkinjođihangoddi ráhkadan listtu doaibmabijuide, mas earret eará gesset ovdan dárbbu rievdadit láhkaásahusaid. Vai listoevttohasat ožžot buoret bálvalusa, lea dárbu ahte jienastuslohku addojuvvo sidjiide digitálalaččat. Lea maiddái dárbu rievdadit almmuhanvugiid, ja aviisaalmmuheami lassin geavahit sosiála lávddiid. Dat lea láhkaásahusaid moderniseren ja heiveheapmi teknologalaš ovdáneapmái.
Dievasčoahkkinjođihangoddi oaidná maiddái dárbbu buoridit diehtojuohkima sámediggeválggaid ja válggaid čađaheami birra, sihke jienasteddjiide ja listoevttohasaide, muhto maiddái gielddaide ja sin válgabargiide, ja maiddái mediai.
– Mii oaidnit ahte buoriduvvon diehtojuohkin lea dehálaš, earenoamážit gielddaide. Jus gielddain lea vuđolaš máhttu válggaid čađaheami birra, de dat dahká sidjiide álkibun čađahit válggaid, dadjá dievasčoahkkinjođiheaddji. Dievasčoahkkinjođihangoddi oaivvilda ahte dárbbašlaččamus doaibmabidju lea liikká dat ahte Sámediggi oažžu jahkásaš bušeahttalassáneami nanusmahttit iežas hálddahuslaš resurssaid válgabargguide. Sámediggi oažžu liigejuolludeami válgajagi. 2021:s lei supmi 3,5 miljovnna ruvnnu. Dát gokčá earret eará deaddilemiid ja jorgalanbargguid.
Eai addojuvvo makkárge eará juolludeamit válggaid várás muđui.
– Sámedikki bušeahtas ii leat vejolaš várret jahkásaččat ruđa válgabargui. Dan dihte lea dárbbašlaš ahte Sámediggi oažžu jahkásaš lassáneami iežas bušehttii. Dál geavaha Sámediggi resurssaid mat leat válgadirektoráhtas, muhto lea liikká Sámediggi mii lea sámediggeválggaid bajimuš hálddašeaddji ja dan dihte lea dehálaš ahte Sámediggái addojuvvojit doarvái resurssat válggaid čađaheapmái, dadjá dievasčoahkkinjođiheaddji Tom Sottinen.
Dievasčoahkkinjođihangoddi háliida loktet čakčat sierra ášši dievasčoahkkimii válggaid birra. Vai dievasčoahkkinjođihangoddi sáhttá loktet ášši dievasčoahkkimii, de ferte dievasčoahkkin addit fápmudusa dasa.
Fápmudusášši meannuduvvo dievasčoahkkimis geassemánus.
