Nordkalottfolket sámediggeáirras Torill Bakken Kåven evttoha Sámedikki ođđa áššiid dieđiheamis ahte meahcástallamii ja kultuvrralaš luondduresurssaávkkástallamii ásahuvvošii sierra láhka.
Torill Bakken Kåven evttohusas čuožžu ná:
«Meahcceealáhusat nu go murjen, jávreguolásteapmi ja murren leat measta oalát jávkan. Stáhta lea oainnusmahtton ja vealahan sámi ealáhusaid dainna lágiin ahte eai leat nannen jávreguolásteami ja murjema ealáhussan. Dál lea áigi loktet meahcceealáhusaid ja bargat dan ovdii ahte dat ožžot seammaárvosaš eavttuid go earáge ealáhusat. Dat sáhttá mielddisbuktit čuohtenáriid bargosajiid meahcis, guoddevaš ja ođasmahtti bargosajiid mat seammás nannejit ja ovdánahttet sámi luonddulagasvuođa, mii leat nu dehálaš sámi kultuvrra ceavzimii davvin.
Sámediggi bivdá sámediggeráđi álggahit barggu sierra ealáhuslágas mii fátmmasta meahcceealáhusaid gáttis, nu go jávreguolásteami, boazodoalu, duddjoma, murjema, urttasčoaggima, vuovdedoalu ja iešguđetlágan lotnolasealáhusaid. Ealáhusláhka galgá leat boahtteáiggediđolaš ja birasfuomášuhtti, ja galgá ovddidit luondduvuđot ođđahutkama ja vuhtiiváldit báikkálaččaid rivttiid bargat meahccedoaluin ja kultuvrralaš meahcástemiin. Seammás galgá láhčit dili buori rekruteremii aktiivvalaš meahcástallamiin.
Boazodoalus lea otná beaivve sierra boazodoalloláhka, ja dan galggašii maid ohcat oassin ealáhusláhkii, mii guoská visot meahcceealáhusaide. Jus dat bearehaga vádduda barggu, sáhttá boazodoalloláhka ain bissut sierra láhkan, muhto ferte sihkkarastit iešguđet ealáhusaid dásseárvvu ja láhčit dili vai verddevuohta, mii mearkkaša viiddis ovttasbargu ja oktavuohta, lea vejolaš. Dan sáhttá dušše sihkkarastit jus visot ealáhusaid meannuda seammadássásaččat.»
