Stall Eivik oažžu Sámediggeráđis 75 000 ruvdnosaš doarjaga go ovdánahttet julevsámegiela.
Stall Eivik, lea oapmedállu Skillvassbakkenis Hábmera suohkanis, gos čađahit julevsámegiela oahpahusa praktihkalaš bargguid bokte.
Andrine Øvervold Eivik jođiha Stall Eivik fitnodaga ovttas isidiin. Son muitala sis leat máŋga prošeavtta jođus main olbmot sáhttet fitnat sudno oapmedálus seammás go ohppet julevsámegiela ja kultuvrra.
– Ulbmil prošeavttain lea oažžut eambbosiid oahppat ja geavahit julevsámegiela. Sámedikki doarjja addá vejolašvuođaid gártadit buori barggu sihke gielain, kultuvrrain ja pedagogihkain. Da lea dehálaš fáladat Hábmera ássiide vuoi ožžot eaiggátvuođa sámegillii ja kultuvrii, dadjá Eivik.
UtSijdda Mánnávuodamujtto
Dal áigu Stall Eivik čađahit ođđa prošeavtta «UtSijdda Mánnávuodamujtto» mas ulbmiljoavku leat mánát gaskkal 0 ja 6 jagi. Eivik dadjá lea buorre vuohki oahppat giela praktihkalaš bargguid bokte ja seammás oažžut buriid mánnávuođamuittuid.
– Mis ii leat ovdal leamaš prošeakta daid unnimus mánáide. Dan leat ohcalan dán guovllus ja nu mii háliideimmet bidjat johtui dakkár prošeavtta. Ulbmil dan prošeavttas lea oahpahit mánáide julevsámegiela praktihkalaš bargguid bokte. Dat mearkkaša ahte mii leat olgun bargame elliiguin goas sii sáhttet oahppat ođđa sániid dahje muđui dušše háleštit sámegiela. Dat mii lea miellagiddevaš dán prošeavttas, lea ahte váhnemat ožžot fárrolaga mánáin bargat praktihkalaš bargguid ja oahppat sámegiela, dadjá Eivik.
Sámediggerađđi
Sámediggeráđđelahttu Mikkel Eskil Mikkelsen (NSR) muitala preassadieđáhusas ahte Stall Eivik lea bivnnut goavddášsadji gos olbmot iešguđet agis sáhttet oahppat julevsámegiela.
– Stall Eivik bargá buori pedagogalaš vugiin vuoi giella gullo, geavahuvvo ja geahččaluvvo.
Mikkelsen loahpaha preassadieđáhusas:
– Lea ilolaš go sámediggeráđđi doarju Stall Eivik vuoi sii sahttet joatkit fálaldaga Hábmera ássiide. Ja dan háve manná guovdilastin mánáide.
