RDM-Porsáŋggu musea bovde čájáhusrahpamii gos čájehit Liv Engholm govvačájáhusa. Son govve earret eará luonddu, olbmuid ja elliid, ja sus lea álo govvenapparáhtta fárus.
RDM-Porsáŋggu musea bovde čájáhusrahpamii gos čájehit Liv Engholm govvačájáhusa. Son govve earret eará luonddu, olbmuid ja elliid, ja sus lea álo govvenapparáhtta fárus.
RiddoDuottarMuseat-Porsáŋggu musea bovde čájáhusrahpamii lávvardaga čakčamánu 23. beaivvi gos áigot ovdanbuktit Kárášjoga govvejeaddji Liv Engholm govvačájáhusa.
– Su áŋgiruššan ja dáiddalaš attáldagat oidnojit čielgasepmosit go govve olbmuid, elliid ja luondduhámiid, čállet sii preassadieđáhusas.
Erenoamaš čehppodagain darveha
RiddoDuottarMuseat-Sámi Dáiddamagasiidna Kárášjogas háliida ovdanbuktit Kárášjoga govvejeaddji Liv Engholma govvačájáhusa.
– Liv Engholma govat deaivvadit luonddu-, dáidda ja dokumentáragovvema gaskka. Earenomáš čehppodagain son darveha bottožiid govvenapparáhtain ja buvtteha bottožiid, hámiid ja čuovgga, čállá RDM.
Govve luonddugovaid
Liv Engholm lea bajásšaddan luonddu ja Kárášjoga kultuvrra lahka.
– Bajásšattadettiin son beroštišgođii govvemis. Beaivválaččat son bargá láidesteaddjin, eanaš guhkit dálvemátkkiide ja sus lea álohii kámera fárus, leaš dál stuorát vai smávit mátki, čállet sii.
(Ášši joatká gova vuolde)
Son govve luonddugovaid gos darveha luonddu bottožiid. Go dokumentere elliid ja olbmuid luonddu hálddus, de govat ovdanbuktet vuoibmás ilu ja movtta go olmmoš lea luonddus.
Dáiddalaš áttaldagat oidnojit čielgasit elliidgovain
Engholm lea iežas ovdánahttán govvejeaddjin go lea olu govven, fágalaččat gealbudan ja ođasmahttán iežas oahpu, ja go lea bidjan návccaid iežas govvensearvái.
– Son lea maid belohahkii profešonaliseren govvendáiddus go ieš lea oahpahan earáid govvet, dokumentašuvdnagovvemiin bargan museaide ja ásahusaide ja muđui govven iešguđetge dilálašvuođain, čállá musea.
Son lea maid vuovdán govaid čikŋan ruovttuide, mediaide, áigečállosiidda ja aviissaide. Su áŋgiruššan ja dáiddalaš attáldagat oidnojit čielgasepmosit go govve olbmuid, elliid ja luondduhámiid.
Čájáhusáigi ja báiki
Čájáhusrahpan lea lávvardaga čakčamánu 23. beaivvi diibmu 12:00. Čájáhusbáiki lea Porsáŋggu musea Dáiddaarena, Fefo-visti 1. Gearddis, Leavnnjas. Čájáhusáigodat 23.9.2017-15.1.2018
Guossoheapmi gussiide.
Dán dieđihit RiddoDuottarMuseat preassadieđáhusas.
