-Almmuhus-
-Almmuhus-
OĐĐASATEkonomalaš rihkkun Davvi-Norgga feastariemuin

Ekonomalaš rihkkun Davvi-Norgga feastariemuin

Journalista

-

-

Davvi-Norgga feastariemut leat váidán ášši politiijaide, go vearredahkkit galget dájuhan sis alcceseaset 82 400 euro.

Davvi-Norgga feastariemut dieđihit preassadieđáhusas ahte leat váidán ášši. Geassemánus dán jagi galgá ekonomiijaovddasvástideaddji Davvi-Norgga feastariemuin ožžon e-poastta soapmásis, guhte dájuhii ahte lea riemuid direktevra, Maria Utsi.

Das galgá sihtan máksit 33 150 euro eŋgelas báŋkokontui. Ekonomiijaovddasvástideaddji lei bivdán duođaštusaid, muhto oaččui dieđu ahte dat sáddejuvvojit maŋŋil.

Seamma sullasaš e-poasta galgá boahtán fas moadde beaivvi maŋŋil, gos siđai 49 250 euro ges máksit muhtun turkulaš báŋkokontui.

Loahpas geassemánus ožžo Davvi-Norgga feastariemut dieđu ahte dát leat vearredahkkit.

 

Olu hutkan

– Dákkár vearredaguid gohčodit direktevravearredahkkun. Lea čielga trenda ahte vearredahkkit šaddet čeahpibut iežaset doaimmain. Sii gávnnahit geat leat váldoolbmot fitnodagain. Dán dáhpáhusas leat maid ráhkadan sierra e-poastačujuhusa direktevrra namas, ja buriin dárogielain bivdán sirdit ruđaid, čállá Davvi-Norgga feastariemut preassadieđáhusas.

– Dá ii lean dakkár maila mii lea mannan olu fitnodagaide. Min ekonomiijaovddasvástideaddji lei áibbas sihkar ahte lei fitnodaga jođiheaddji guhte siđai sirdit ruđaid, lohká stivrajođiheaddji Jens Johan Hjort.

 

Váruhit earáid

– Mii oaidnit ahte maiddái kulturealáhus vásiha dákkár dáhpáhusaid. Mii háliidit váruhit eará fitnodagaid ja organisašuvnnaid. Mii leat čavgen rutiinnaid dákkár erenoamáš ruhtasirdimiin, ja dát ii galgga šat dáhpáhuvvat, lohká direktevra Maria Utsi preassadieđáhusas.

 

Økokrim bargá áššiin

Ášši váidui Hárštákk politiijakámmárii geassemánu 30.beaivvi. Báikkálaš politiijat sáddejedje ášši Økokrimii, geat dál čuovvolit ášši.

– Hárštákk politiijat leat dutkame ášši, ja Økokrim lea veahkkin. Mii leat bivdán veahki eará riikkaid eiseválddiin, muhto sáhttá leat váttis dákkár áššiin ovdánit, go vearredahkkit eai geavat albma namaid ja čujuhusaid, lohká Mona Madsen. Son lea Harstad politiijaid jurista.

Vahát boahtá dovdot dán jagáš jahkebohtosis, ja lea stuora oassi feastariemuid bušeahtas.

– Dán jagáš feastariemut ledje hui buorit, sihke ruđalaččat ja gussiid ektui. Muhto lea čielggas ahte dát váikkuha jahkebohtosa. Dál fertet geahččat buot goluid, ja geahččalit unnidit doaimmaid doppe gos sáhttit, vai ii billis boahtte jagi riemuid dáiddalaš oasi, loahpaha Utsi.

-Almmuhus-