Giđđat lea Sápmi Pride festivála Kárášjogas, ja oasálastit bivdet saji ja dohkkeheami girkus. Ihttin gahčá duopmu go Kárášjoga searvegotteráđđi meannuda jearaldaga Sápmi Pride ipmilbálvalusa birra.
Sápmi Pride lágiduvvo nuppes miessemánu 27. – 31. beaivái, ja dán vuoru čoahkkanit sámi homofiillat, lesbat, bifiillat, trans-seksualálaččat ja queerat Kárášjohkii. Sidjiide lea dehálaš dohkkehuvvot girkus ja danin hástalit lágideaddjit Kárášjoga girku doallat ipmilbálvalusa sin doaluid oktavuođas.
– Min searvvis leat oallugat risttalaččat, ja mii háliidit danin ipmilbálvalusa. Midjiide livččii hui dehálaš girku doarjja, muhto lea dieđusge girku mearrádus. Sámi servodat dárbbašivččii eanet rabasvuođa, ja go Sámis leat olu risttalaččat de olahivččiimet oallugiidda girku dohkkehemiin, lohká Sápmi Pride prošeaktajođiheaddji Leammuid Lemet Ánde.
Stuora vuordámušat
Olu sámi homofiillat, lesbat, bifiillat, trans-seksualálaččat ja queerat rahčet beaivválaččat dohkkehuvvot servodagas. Leammuid Lemet Ánde dadjá dattege Kárášjoga servodaga eanet liberálan go ovdamearkkadihti Guovdageainnu, Gárasavvona, Ohcejoga ja Anára servodagaid, danin leat sus stuora vuordámušat ruovttubáikkis girkui.
– Jus lágidit ipmilbálvalusa, de livččii Kárášjohka buorre ovdagovvan eará báikkiide. Jus hilgot jearaldaga de lea hui suddu ja váivi, de eai oainne dárbbu čáhkkehit saji buohkaide girkui. Buohkat han galggašedje dovdat buresboahtima Ipmila vissui. Eat mii gaikkot girku, muhto dáhtut oasálastit ja gullat Ipmila sáni, lohká Leammuid Lemet Ánde.
Mearrádus váikkuha
Norgga girkus leamaš digaštallamat homofiillaid dohkkeheami birra ja leamaš maid sáhka galget go homofiillat ja lesbat vihahuvvot girkus. Sápmi Pride prošeaktajođiheaddji lohká ahte girkus berrejit rahpat uvssaid go doppe dihtet viehka bures makkár eallinhástalusat homofiillain ja lesbain sáhttet.
– Girkus lea stuora gelbbolašvuohta go doppe hávdádit eanemus lesbaid ja homofiillaid geat leat sorbmen iežaset. Girku ferte rahpat uvssaid vai manašii ovddasguvlui, dadjá Leammuid Lemet Ánde.
Meannudit ihttin
Sápmi Pride riŋgii álggos Kárášjoga girkui, muhto ožžo dieđu ahte galget sáddet jearaldaga čálalaččat. Kárášjoga girkus eai dáhto kommenteret ášši ovdal searvegotteráđđi meannuda jearaldaga. Duorastaga eahkeda čoahkkana Kárášjoga searvegotteráđđi ságastallat dán ášši birra. Norgga girkuin leamaš digaštallamat galget go homofiillat vihahuvvot girkus vai eai. Dasa lassin diehtit ahte buot ii leat dohkálaš Sis-Finnmárkku girkuin, luohti lea gildon sihke Kárášjogas ja Guovdageainnus.
– In bala hárdit iežamet jearaldagain. Juohke buorredáhtolaš risttalaš lea lohkan biibbalis ahte galgá dohkkehit olbmuid ja veahkehit nubbi nuppi, lea maid dehálaš muitit ahte mii eat galgga dubmet olbmuid. Dat lea Ipmila bargu, loahpaha Sápmi Pride prošeaktajođiheaddji Leammuid Lemet Ánde.
