Eanandoallo- ja biebmodepartemeanta lea sádden gulaskuddamii rievdadusevttohusa boazodoalloláhkii ja eananjuohkinláhkii, mii addá válddi eananjuohkinriektái meannudit boazodoalloáššiid.
Eanandoallo- ja biebmodepartemeanta lea sádden gulaskuddamii rievdadusevttohusa boazodoalloláhkii ja eananjuohkinláhkii, mii addá válddi eananjuohkinriektái meannudit boazodoalloáššiid.
Bargojoavkku evttohusas rahppo vejolašvuohta ahte eananjuohkinláhka sáhttá geavahuvvot boazodoalu siskkáldas diliin. Evttohusas boahtá ovdan ahte jus eananjuohkinriekti bidjá rájiid siiddaid gaskii, de sáhttá maid boazologu mearridit siidii dan ráji vuođul, iige dárbbaš čuovvut boazodoallolága mearrádusaid mearridit boazologu.
– Dat lea buorre
Nu movt dál lea boazodoallolágas de lea boazodoallostivra mii bidjá ja mearrida alimus boazologuid. Boazodoalu stivrralahttu Alf Johansen, ii loga iežas geahččan evttohusa, muhto su vuosttaš jurdda lea ahte dat lea buorre.
– Dat lea buorre go stáhta manná sisa čielggadit rájiid ja boazologuid. Muhto, doppe fertejit gal olbmot geain lea gelbbolašvuohta sámi kultuvrii ja boazodollui, lohká Johansen.
– Ii oro buorre
Guovdageainnu johttisámiid searvvi jođiheaddji Nils Mathis Sara iige leat vel nu dárkilit lohkan evttohusa. Son goitge ii leat nu mielas dasa, das maid lea lohkan evttohusas.
– Orro dáinna gárdume sisa boazodoalu ja čatname áibbas gitta. Lea unohas go doppe galget mearridit, ja ealáhus ieš ii beasa defineret iežas ealáhusa, lohká son.
Semináras fáddá
Danne go lea vuos eahpesihkarvuohta maid rievdadusevttohus duođaid mearkkaša, de lea Guovdageainnu johttisámiidsearvi lágideame seminára dán vahkkoloahpa, seminára gos juste dat lea fáddá.
– Seminárii boahtá Norgga Boazosápmelaččaid Riikasearvvi (NBR) Randi Skum, guhte lea leamaš mielde bargojoavkkus, muitalit dán rievdadusevttohusa birra.
Vuorkágovva: Astrid Helander
Sáddejit cealkámuša
Sara lohká sávvamis bohtet ollu olbmot seminárii, sihke gullan dihte maid dat evttohus mielddisbuktá ja maiddái gažadit dan birra.
– Doppe beassá gullat makkár hástalusat ja muđui eará beliid dan birra. Maŋŋel seminára, go de leat gullan buot beliid, de mii sáddet gulaskuddancealkámuša, lohká Sara.
Jođáneappot meannudit áššiid
Bargojoavkkus, mii álggahuvvui 2014:s, leat mannan giđa loahpahan barggu rievdadusevttohusain. Bargojoavku lea evttohan ahte eananjuohkinriektái addo vejolašvuohta čađahit sihke riektemearrideaddji ja riekterievdadeaddji áššiid siskkáldasat boazodoalus. NBR Randi Skum lohká ii leat nu ahte eananjuohkinriekti sáhttá mannat summal mearridit boazologuid.
– Ulbmil min bargguin lea ahte boazodollui sihkkarastojuvvo duopmostuollovuogádat, mii sáhttá jođánit, hálbbibun ja vuoiggalaččat meannudit áššiid. Mii leat evttohan ahte eananjuohkinriekti galgá meannudat earret eará cegget eananjuohkináššiid go doaibmanjuolggadusat gávdnojit, barggadettiin daiguin, dahje go barggut doaibmanjuolggadusaiguin eai čovdojuvvo, lohká son.
Guhká bargan
Skum muitala sii leat NBR bealis ollu jagiid gáibidan bealátkeahtes kommišuvnna, mii galgá bargat nu movt guohtuneananrájiiguin ja vuoigatvuođaiguin go lea nággu daid badjel.
– De loahpas goit evttohuvvui ahte eananjuohkinriekti, go veaháš dan heiveha, sáhttá geavahuvvot maiddái boazodoalus.
Eaktuda gelbbolašvuođa
Evttohusas leatge ollu čuoggát, ja Skum lohká ii ovttage dain čuoggáin leat vejolaš, jus eananjuohkinriektái ii lasihuvvo gelbbolašvuohta sámi árbevieruid, kultuvrra ja riekteipmárdusa ektui.
– Mii leat hui čielgasit dadjan ahte dakkár gelbbolašvuohta ferte lasihuvvot eananjuohkinriektái, go dat eaktuda olles min evttohussii,lohká Skum. Son lohká ovdamearkka dihte ii sáhte vaikko gii leahkit mielduopmáriin, go dain ferte leahkit boazodoallofágalaš máhttu. Su mielas lea dat buorre boazodollui, jus šaddá nu movt leat oaivvildan.
Bargojoavku
Bargojoavkkus leat leamaš mielde: Hilde Wahl Moen, Duopmostuollohálddahus, Liv Nergaard, Davvi-Romssa eananjuohkinriekti, Øyvind Ravna, Romssa Universitehta, Randi Skum, Norgga boazosápmelaččaid riikasearvi, Torvald Falch, Sámediggi, Johan Ingvald Hætta, Eanandoallodirektoráhtta, Tor Kjøllesdal, Eanandoallo- ja biebmodepartemeanta ja joavkkujođiheaddji Morten Floor, Eanandoallo- ja biebmodepartemeanta.
