Boahtte vahkkoloahpa «Sam Sobbar» nammasaš sámiid orgána áirasat čoahkkanit Guoládatnjárgii Lujávrái gos galget earret eará digaštallat eanangeavaheami árbevirolaš dárbbuid oktavuođas.
Boahtte vahkkoloahpa «Sam Sobbar» nammasaš sámiid orgána áirasat čoahkkanit Guoládatnjárgii Lujávrái gos galget earret eará digaštallat eanangeavaheami árbevirolaš dárbbuid oktavuođas.
Lujávrái čoahkkanit «Sam Sobbarii» válljejuvvon áirasat vai digaštallat earret eará eanangeavaheami ja gillii gullevaš áššiid. «Sam Sobbar» nammasaš orgána, mas leat ovcci sápmelačča, čoahkkana juovlamánu 12. beaivvi. Dát lea gavccát geardi go «Sam Sobbar» doallá čoahkkima. «Sam Sobbar» válljejuvvui skábmamánu 22. beaivvi 2014 Guoládatnjárgga sámiid goalmmát kongreassas masa serve 65 sámeovddasteaddji geat válljejedje ovcci áirasa rabas jienasteami bokte. «Sam Sobbar» bargun lea čalmmustahttit ja gulahallat Murmánskka guovloeiseválddiiguin sámiide gullevaš áššiid oktavuođas. «Sam Sobbara» mearrádusain lea ráđđeaddi stáhtusa.
– Boahtte čoahkkimis maiddái digaštallat eavttuid maid vuođul eatnamiid sáhttá gohčodit árbevirolaš eanamin ja man vuođul daid sáhttá gohčodit árbevirolaš ealáhusaid eanamin. Dasa lassin digaštallat vuogádaga go álgoálbmogat galget duođaštit iežaset gullevašvuođaid álgoálbmogii. (Murmánskka guovllus áidna álgoálbmogin leat sápmelaččat. – Ávvir). Sierra áššin lea bargu sámegiela seailluheami ektui, čállá Murmánskka guovllu álgoálbmogiid stáhta guovddáš iežas neahttasiiddus mii koordinere «Sam Sobbara» barggu.
«Sam Sobbara» čoahkkimii galget searvat maiddái luondduriggodagaid guovlodepartemeantta ovddasteaddjit, giella- ja oahppoguovlodepartemeantta ovddasteaddjit ja earát. Muđui ge lea čoahkkin rabas buohkaide.
Mannan dálvvi, ođđajagemánu loahpas, go “Sam Sobbar” doalai bargočoahkkima Murmánskka guovllu sátnejođiheddjiin, de dat dajai «Sam Sobbar» birra ná:
– Munnje lea dehálaš ipmirdit «Sam Sobbara» áigumušaid ja ulbmiliid, vuogádaga man bokte olahit daid ulbmiliid ja áigumušaid ja man stuorra doarjja dása gáibiduvvo. Stuorra prošeavttaid čađahemiid oktavuođas árktalaš guovllus mii dárbbašit bissovaš gulahallama sámi ovddasteddjiiguin ja sámi servviiguin, logai bargočoahkkimis dalle Murmánskka guovllu sátnejođiheaddji Marina Kovtun.
