Nordlándda fylkkas illudit go ledje 172 máná geat ožžo sámegieloahpahusa vuođđoskuvllas diibmá, ja dat lea alimus lohku dán rádjái ja olahus Nordlánddas.
– Lea nu illudahtti go ohppiidlohku lea sakka lassánan sámegielas, mii lea 46 proseantta lassáneapmi maŋemus njealji jagis, muitala Bajásšaddan- ja oahpahusossodaga oahpahusdirektevra Guri Adelsten Iversen Nordlándda Fylkkamánni jahkedieđáhusas.
– Mii leat bargan strategalaččat vai oahppit sáhttet válljet sámegielafága, ja mii leat nannen diehtojuohkinvuogádaga suohkaniidda, skuvllaide ja ohppiide, ja váhnemiidda juohkán dieđuid rievtti birra oažžut sámegiella oahpahusa skuvllas, čilge Iversen.
Ohppiidlogu olahus diibmá
Nordlándda fylkkamánni jođiha julevsáme- ja lullisámeoahpahusa Norggas, ja čuovvu ohppiidlogu statistihka dárkilit.
Našunála dásis ii leat sámegieloahpahusa ohppiidlohku lassánan, čájehit logut Vuođđoskuvllaid diehtojuohkinvuogádagas.
Nordlánddas manná nuppe guvlui, ja ovddit skuvlajagi lei ođđa olahus ohppiidlogu ektui geain lei sámegiella vuođđoskuvllas.
172 oahppi ohppet davvisámegiela, julevsámegiela dahje lullisámegiela Nordlándda vuođđoskuvllain, dieđiha Nordlándda Fylkkamánni 2016 jagi jahkedieđáhusas.
Sámegielfága oahpahus alla dásis maid
– Oahppit sáhttet oažžut gáiddusoahpahusa, ja orrunbáiki ii galgga leat hehttehussan beassat oahppat sámegiela, deattuha Iversen.
Son lasiha ahte oahppofálaldagat nannejuvvojit alit oahpuin maid, sihke joatkkaskuvllain, universitehtain ja allaskuvllain, nu ahte sámegielat ohppiin lea stuorát vejolašvuohta čađahit sámegielfága olles oahppoáiggi.
