– Dan sáhtášii garvit, lohket ekspearttat.
– Dan sáhtášii garvit, lohket ekspearttat.
Juohke viđat davvi-norgalaš lea jávkan barggus dahje skuvllas allergiija dihte. Dan čájeha áibbas ođđa iskkadeapmi man YouGov lea Allergiguiden ovddas čađahan. Seammás čájehit logut ahte juohke viđat davvi-norgalaččas lea allergiija man ii dálkkot. Ekspearttat oaivvildit ahte dan sáhtášii garvit, jus eambbosat livčče doaktára lusa mannan, dahje jus eambbosat válddáše dálkasiid. Dan dieđiha Allergiguiden preassadieđáhusas.
– Allergiija mii ii dálkkoduvvo, buktá dárbbašmeahttun alla buozalmasvuođajávkama. Danne lea dehálaš rievttes diagnosa oažžut doaktáris. Dálkasat fertejit geavahuvvot ovdal go pollenáigodat álgá, ja maiddái olles áigodaga, lohká Sørlandet buohcciviesu beallje-njunne-čottaossodaga jođiheaddji Sverre Steinsvåg.
Eambbosat ožžot allergiija
Leat stuora servodatekonomalaš váikkuhusat go buozalmasvuođajávkan lassána pollenallergiija dihte. Seammás lea lossat sutnje geasa gullá. Vuoiŋŋahatbohcci lassána ja lassána álbmogis, dálkkádatrievdamiid dihte ja eallinvuogi dihte. Academy of Allergy and Clinical Immunology einnosta ahte bealli Eurohpá álbmogis álget buohcat vuoiŋŋahatallergiijain boahtte logi jagis.
– Allergiija lassána, ja olu pasieanttat eai gierdda liikká olu go ovdal. Jus galgat hehttet ahte buozalmasvuođajávkan ii lassán liikká olu, de dárbbašit mii eambbo máhtu allergiijadálkkodeami birra, lohká Steinsvåg.
Son rávve olbmuid, geat gillájit allergiijain, váldit oktavuođa doaktáriin. Maiddái sii geat eai dieđe lea go sis allergiija vai dábálaš giđđanuorvu.
