Golbma sámi girječálli ledje nammaduvvon Davviriikkaid ráđi girjjálašvuođa bálkkašupmái, muhto vuoitu ii boahtán Sápmái ikte.
Mary Ailonieida Sombán Mari lei nammaduvvon Davviriikkaid ráđi girjjálašvuođa bálkkašupmái diktagirjjiinis «Beaivváš mánát». Jury árvvoštallama vuođul attii Davviriikkaid ráđđi dán jagáš girjjálašvuođa bálkkašumi dánskka girječállái Solvej Balle «Om udregning af rumfang (I,, II og III)» girjji ovddas.
Davviriikkaid ráđi mánáid- ja nuoraidgirjjálašvuođa bálkkašumi alde gilvaledje earret eará Sara Vuolab (27) diktagirjjiinis «Gárži» ja Moa Backe Åstot (22) girjjiinis «Himlabrand». Muhto bálkkašumi vuittii norgalaš girječálli Nora Dåsnes girjjiin «Ubesvart anrop».
Davviriikkaid Ráđi girjjálašvuođa bálkkašupmi geigejuvvui Helssegis, skábmamánu 1. beaivvi, ja bálkkašupmi lea 300 000 dánskka ruvnno.
30 jagi dassái
Davviriikkaid Ráđi girjjálašvuođa bálkkašupmi lea geigejuvvon jahkásaččat 1962 rájes. Dan rájes go álge juohkit dán bálkkašumi, de lea sápmelaš vuoitán oktii dan, 1991:s. Dat lei Áillohaš dahje Nils-Aslak Valkeapää girjjiin «Beaivi, Áhčážan» (Solen, min far), mii almmuhuvvui DAT lágádusa bokte 1988:s.
