Kárášjoga sierralobilávdegoddi hilggui váidaga man 13 skohtervuoddji ledje ovddidan, ja doalahit biehttaleami addimis sidjiide sierralobi.
Kárášjoga sierralobilávdegoddi hilggui váidaga man 13 skohtervuoddji ledje ovddidan, ja doalahit biehttaleami addimis sidjiide sierralobi.
Kárášjoga gielddas lea sierralobilávdegoddi mánnodaga meannudan váidaga man 13 skohtervuoddji ovddidedje go sidjiide biehttaluvvui vuodjinlohpi Rávdojávrriide. Gieldda áššebáhpiriin boahtá ovdan ahte lávdegottis ledje guokte evttohusa, doalahit mearrádusa ja hilgut váidaga dahje vuhtii váldit váidaga ja dohkkehit ohcamiid.
Lávdegotti golbma áirasa, Olav Sara Nikkinen (Bargiidbellodat) Gunn Anette Anti Aslaksen (Guovddašbellodat) ja Johan Sámmol Nedrejord (Olgeš), jienastedje ja sii doalahedje iežaset mearrádusa guvttiin ovtta jiena vuostá.
Váidán go earát ožžon
Gieldda áššebáhpiriin boahtá ovdan, ahte Guovddášbellodaga áirras Gunn Anette Anti evttohii hilgut oktasaš váidaga man dat 13 olbmo ledje sádden. Aslaksen ákkastii biehttaleami go váidda sáhttá ipmirduvvot dainnalágiin, ahte dat 13 olbmo váidet go earát leat ožžon sierralobi, iige dan go iežaset ohcamat leat biehttaluvvon.
Váidagis ii čujut ahte ohcciin leat erenoamáš dárbbut mat galggaše dohkkehit sin ohcamiid našunála láhkaásahusa mielde geavahit mohtorfievrruid meahcis ja jávrriid alde. Sierralobilávdegoddi doalaha mearrádusa maid dahke guovvamánu 9. beaivvi, go eai leat boahtán ođđa bealit áššis.
Ávvir ii leat fidnen ságaide Gunn Anette Anti Aslaksen kommenteret ášši. Son lea ge ieš ožžon 4 jahkái Rávdojávrriide fievrredit skuteriin biergasiid guolásteami olis, ja lea ovdal dadjan Ávvirii ahte son ii sáhte kommenteret ášši go lea bealalaš.
Čavga praksis guovllus
Guovddášbellodaga evttohusa čilgehusas čállet sii ahte Kárášjoga gielddas lea leamaš čavga sierralobipraksisa maŋemus 20 jagi mii guoská sierralobiide ohccojuvvon guvlui, Rávdojávrái/ Ánttetjávrái, dainna ákkain ahte gielda ii hálit ollu mohtorjohtolaga daidda jávrriide. Kárášjoga juhkančáhcegáldut leat dáin guovlluin (Guorpmet, Rávdojávrrit ja Ánttetjávri), ja vuhtii váldima dihte daid ja birrasa gáhttet, de lea gielda doalahan hui streaŋga sierralobipraksisa.
Ii kommentere
Bb evttohus Nikkinen bokte lei vuhtii váldit váidaga, ja son čujuhii johtučállosa T-1/96 paragráfa 7.3.3, 8. čuoggái, mii ii atte vejolašvuođa meannudit ohcamušaid iešguđet ládje. Lávdegotti jođiheaddji Olav Sara Nikkinen ii hálit kommenteret ášši. Ávvir ii leat ožžon ságaide Nedrejorda ge.
Áigo lohká mearrádusa
Okta dan 13:sis geat ledje sádden váidága, Edvard Johansen, lohká ožžon sierralobilávdegotti mearrádusa váiddaáššis dušše njálmmalaččat.
– In hálit vuos dadjat maidege ovdal go lean ožžon mearrádusa čálalaččat ja lohkan dan, dadjá son.
