Oaččui go Vegard Olsen njáskanbarggu ovtta čoahkkimis vai ii, lei okta dain áššiin mii gárttai riidogaskaoapmin suohkanhálddahusa ja Vegard Olsen gaskkas.
– Dušše fal okta ášši lea áibbas čielggas. Vegard ii ožžon goassege suohkanis njáskanbarggu, lohká teknihkalaš ovttadaga jođiheaddji Sindre Murud.
– Ii lean čoahkkin
Mannan vahkus almmuhii Ávvir ahte lei Dáloniid Listtu suohkapolitihkkar ja sátnejođiheaddji bárdni, Vegard Olsen, gii čálii unohis teakstadieđuid ja maillaid suohkandirektevrii. Son lei duhtameahttun danne go suohkan galgá leat rivven sus meahccečorgenbarggu.
Vaikko boahtá ovdan suohkanstivrra áššebáhpiriin ahte suohkan easkka golggománus mearridii skuterláhtuid, ja vaikko Olsen ii leat makkárge dokumentašuvnna čájehan das ahte oaččui barggu, de Olsen lohká čorgenbarggu juo ožžon geassit, čoahkkimis gos son, teknihkalaš ovttadaga jođiheaddj Sindre Murud ja seamma ovttadaga bargi Isak Mathis O. Hætta ledje.
Maiddái Hætta čuoččuha čoahkkima dáhpáhuvvan.
– Ii leamaš dakkár čoahkkin goassege, lohká ges Murud ja čilge viidáset:
– Dien áigge go Olsen čuoččuha čoahkkima leamaš, de Hætta ii lean barggus. Jus veaháge jurddaša logihkalaččat, de geasset eai lean vel mearriduvvon skuterláhtut. Ii suohkanstivra goit skuterláhtuid mearrit ovdal go golggotmánus, nu ahte ii leat lunddolaš ahte plánet skuterláhtu bargguid ovdal suohkanstivračoahkkima, lohká Murud.
– Suohkan čuovvu njuolggadusaid
Murud maid čilge ahte justa dat čorgen mii dárbbašuvvui doppe gos Vegard dihkkádii, lei dan mađe stuora bargu ahte njuolggadusaid mielde fertii dasa vižžojuvvot haddefálaldat.
– Go leat dakkár smávva čorgenbarggut láhtuid guora, de mii leat lohkan Vegardii ja eará dihkkádeddjiide ahte sáhttet dahkat dan. Dalán go barggus šaddá eambbo árvu go 10 proseantta ollislaš bargogolus, de šaddá eará ášši.
– Justa dat bargu man birra Vegard hupmá lei čorgenbargu máŋga kilomehtera guhkosaš láhtus. Mun dieđihin Vegardii ahte bargu lea dan mađe stuoris ahte das ferte almmolaš haddegilvu ja bovdejin Vegarda searvat dasa. Suohkan lea geatnegahtton čuovvut oastinnjuolggadusaid maid suohkanstivra lea mearridan. Dat dáhpáhuvai suohkanstivrra njuolggadusaid siskkabealde, ja jus Vegard oaivvilda son sáhttá spiehkastit dain njuolggadusain, de in dieđe makkár fápmudus sus lea, lohká Murud.
– Son han lohká ahte nubbi dihkkádeaddji oaččui automáhtalaččat čorgenbarggu iežas láhtu guora. Manne Olsen ii ožžon dan?.
– Dan láhtu bokte lea nu unnán bargu ahte das ii lean sáhka go moadde duhát ruvdnosaš barggus. Go dihkkáda skuterláhtuid, ja čorgenbargu ii leat divrasat go 10 proseantta dan obbalaš čorgenbarggus, de lea vejolaš nu dahkat. Nu geavai dan nuppi dihkkádeaddji ektui, lohká Murud.
Vegard Olsen lohká son loktii ášši váiddalávdegoddái gos hálddahusbargi Isak Mathis O. Hætta lea jođiheaddji iežas politihkalaš ámmáha bokte. Ášši ii goassege joavdan formálalaččat váiddalávdegoddái.
Vegar Olsen lea dáhtton searvat ođđa jearahallamii, muhto ii leat váldán oktavuođa nu go šiehtaduvvon.
