Nancy Porsanger lohká iežas dolkan bealleheggii vuogádahkii man čađa galgá sáddet jahkásaš boazodoallodieđáhusa. Son muitala vásihan vaikke makkár meattáhusaid jahkeviissaid, muhto go dán jagi ihte fas vierrolbmuid persovdnadieđut su skovvái, de gal váiddii ášši Diehtobearráigehččui.
Nancy Porsanger lohká iežas dolkan bealleheggii vuogádahkii man čađa galgá sáddet jahkásaš boazodoallodieđáhusa. Son muitala vásihan vaikke makkár meattáhusaid jahkeviissaid, muhto go dán jagi ihte fas vierrolbmuid persovdnadieđut su skovvái, de gal váiddii ášši Diehtobearráigehččui.
Boazodoallodieđáhusa galgá juohke siidaoasi jođiheaddji sáddet Eanandoallodirektoráhtti, mas buot siidaoasi miellahtuid boazolohku boahtá ovdán.
Dieđáhus galgá siste cuoŋománu 10. beaivvi, ja juste dál leat olusat deavdime skovi.
Nancy Charlotte Porsanger Anti dieđáhussii bohte dieđut olbmo birra gii ii gula su siidaoassái. Dat lea nu duođalaš ahte son dieđihii Diehtobearráigehččui.
– Systemas leamaš logi jagi juo boasttuvuođat, ja lean dolkan bealleheggii. Dat lea duođalaš ášši go persovdnanummárat ja kontonummárat mannet vierroolbmuide, dat rihkku lága, lohká Čorgaš boazodoalli Nancy Charlotte Porsanger Anti.
Dieđihan Diehtobearráigehččui
Son lei váidán ášši Diehtobearráigehččui ja Eanandoallodirektoráhtas riŋgejedje ja muitaledje ahte leat divvon boasttuvuođa.
– Sii šállošedje hirbmosit, ja áddii ahte ii leat dohkálaš, muitala Porsanger Anti.
Nancy Charlotte deavdá máŋga rehketdoalu ja boazodoallodieđáhusa jagis, ja su mielas lea heitot systema njuolgut badjelgeahččalasvuohta.
– Systema ii leat doaibman goassege, muhtumin mun lean lobihis miellahttu siidaoasis, vaikko lean eaiggát. Eará háviid fas mu mánát. Mii boazodoallit deavdit vearrodieđáhusaid, ealáhusdieđáhusaid ja vaikko maid, ja dat manná áibbas bures. Dát lea badjelgeahččalasvuohta boazodolliid ektui go eai leat vel molson systema, vaikko dihtet dat ii doaimma. Danne mun válljejin dieđihit Diehtobearráigehččui, ja ávžžuhin earáid maid dahkat dan.
Moaddelogi logu
Porsanger Anti muitala ahte leat juohke jagi váttisvuođat deavdimiin. Jus lea deavdán ovtta logu, ja dan galgá rievdadit, de ferte riŋget Eanandoallodirektoráhta kantuvrii, ja dat šaddet rievdadit logu.
– Dás lea duššo sáhka moadde tállas, muhto álo šaddá riŋget ja oažžut Eanandoallodirektoráhta bargiid mannat deavdit loguid. Norggas ii leat váttis skoviid deavdit, muhto eai leat váldán duođas go lea badjeolbmuid skovvi. Dieđán leat olusat geat áin addet báberskoviid go leat nu olu váttisvuođat, mii ođđa áiggis ii galggašii dárbbašlaš, lohká son.
– Mun vuorddán dán buorránit, ja oainnán Norgga Boazosápmelaččaid Riikkasearvi lea váldán ášši. Mis galggašii álkis systema, galggašii telefovnnas sáhttit deavdilit dan, go eai leat go 20-30 logu mat galget sisa, lohká Nancy Charlotte Porsanger Anti.
Čorgen ášši
Sekšuvdnahoavda Eanandoallodirektoráhta boazodoallodoarjagiin Tone Seppola čilge sii leat dál divvon boasttuvuođa, ja dat ii galgga šat dáhpáhuvvat.
– Leat ožžon dieđu ahte go boazodoalli lea sádden boazodoallodieđáhusa, ja galgá kvitterega oažžut, de bohtet dan kvitteregis dieđut earáid birra. Mii leat dál divvon, ja kvitteregis eai boađe makkárge dieđut eará go ahte dieđáhus lea sáddejuvvon.
Kvitteret lea duođaštus dain loguin maid boazodoalli lea sádden.
– Logut maid boazodoallit leat dieđihan, galget leahkit riekta. Jus galgá dárkkistit loguid, de ferte dál ođđasit logget sisa. Direktoráhta váldá ášši duođalažžan, dat ii galgga dáhpáhuvvat, ja mii šállošit. Mii leat bissehan dán, ja galgá čorgejuvvon. Mii leat maid dieđihan Diehtobearráigehččui dán birra.
Eanandoallodirektoráhtta lea maid dieđihan váttisvuođa birra sin neahttasiiddus.
– Sáhttet rihkkon lága
Diehtobearráigeahčus duođaštit ahte leat ožžon dieđu dán birra. Eai leat vuos eará ožžon álgodieđu Eanandoallodirektoráhtas.
Ávvir lea beassan oaidnit álgodieđu gos Eanandoallodirektoráhtta čilge váttisvuođa, ja maid leat bargan eastadit dan.
Sii leat maid kárteme leat go eará boasttuvuođat systemas, ja leat bargame ollislaš spiehkastusdieđuin Diehtobearráigehččui.
Go eai leat vuos ožžon ollislaš spiehkastusdieđu, eai sáhte Diehtobearráigeahčus vuos nu olu lohkat ášši birra.
– Eanandoallodirektoráhtas lea ovddasvástádus sihkkarastit ahte systema fuolaha persovdnasuodjaleami. Lea duođalaš jus lea nu ahte olbmot leat ožžon oaidnit earáid dieđuid. Dat rihkku persovdnadieđuidlága, lohká Ylma Marrable, seniorráđđeaddi Diehtobearráigeahčus.
– Mii leat ožžon dieđu Eanandoallodirektoráhtas, ja sii leat gávdnan boasttuvuođa systemas. Mii vuordit ollislaš spiehkastusdieđu, ja de boahtit veardidit spiehkasteami, ja leat go doaimmat doarvái buorit. Váikkuhusat sáhttet vaikko makkárat, muhto vearrámus lea ahte sáhttet oažžut sáhku, lohká Marrable.
