Obdukšuvnnas eai leat gávdnan háviid dahje eará vigiid sudnos geat jámiiga fáhkka Geaissvearas.
Obdukšuvnnas eai leat gávdnan háviid dahje eará vigiid sudnos geat jámiiga fáhkka Geaissvearas.
Gaskaboddosaš obdukšuvdnaraporta muitala ahte eai leat gávdnan makkár ge olgguldas háviid dahje vigiid dan guovtti olbmos.
Soai jámiiga mannan vahkkoloahpa iežaska ruktui Geaissvearas, Finnmárkkus. Soai leigga badjelaš 40 jagi boarrásat.
– Odne leat ožžon dieđu patologas ja sii eai gávnna makkár ge olgguldas mearkkaid mat sáhtáše čilget manne jámiiga, lohká politiijaadvokáhtta Karoline Jensen Johansen NRKii.
Eambbo iskosat
Gaskavahkku maŋŋilgaskabeaivvi ožžo Finnmárkku politiijat gaskaboddosaš obdukšuvdnaraportta. Loahpalaš raporta ii gárván ovdal go birrasii golmma mánu geahčen, čilge advokáhtta.
– Leat maid sádden varra- ja gožžaiskosiid, ja daid bohtosiid oažžut moatti vahkku geahčen, lohká Johansen.
Jápmimiid leat gohčodan imašin, go váhnenguovttos leigga nu nuorat ja jámiiga seamma sadjái.
– Mii diehtit ahte leigga vahkku buohcan streptokokkaiguin, muhto eat mii sáhte das diehtit jápminsiva, lohká Karoline Jensen Johansen.
Son muitala ahte sudno mánát sáddejuvvuiga Hammerfestii buohccivissui, go mánáguoktás ledje maid streptokokkat. Soai sáddejuvvuiga fas ruoktot moadde diimmu maŋŋil.
(©NTB)
