Máze skuvlla oahppit vuite ikte «Dieđát go?» radio-gilvvu. Guovdageainnu nuoraidskuvlla oahppit bohte ges nubbin.
Máze skuvlla oahppit vuite ikte «Dieđát go?» radio-gilvvu. Guovdageainnu nuoraidskuvlla oahppit bohte ges nubbin.
Dan 35 jagis go dát gilvvut leat lágiduvvon, eai leat Máze skuvlla nuorat goassige vuoitán dáid gilvvuid. Danin ievttá vuoitu Máze skuvlii šattai historjjálažžan.
– Dat lea somá go vuittiimet, go Máze skuvla ii leat ovdal vuoitán, ja ahte dát oahppit de šadde vuosttažin, lohká Máze skuvlla joavkojođiheaddji ja oahpaheaddji, Klemet Utsi NRK Sápmái.
Ávvirii ii lihkostuvvan iđitdiimmuin oažžut Máze skuvlla joavkojođiheaddji ságaide gullat mo áigot ávvudit dan historjjálaš dáhpáhusa.
Guovdageainnu nuoraidskuvla lea máŋgii leamaš «Dieđát go?» gilvvuid loahppavuorus, ja maiddái vuoitán gilvvuid, dán háve šattai nubbin.
«Dieđát go?» lea NRK Sámi radiogilvu nuoraide masa dán jagi serve čieža sámi skuvlla: Anár badjedási skuvla, Máze skuvla, Unjárgga oahppogáldu, Guovdageainnu nuoraidskuvla, Ohcejohnjálmmi skuvla, Deanu skuvla, Kárášjoga nuoraidskuvla.
Eará konseapta go ovdal
– Dán jagáš gilvvuin eai lean rehkenastin bihttát mielde nu ollu go ovdal. Mis lea veahá eará konseapta leamaš dan háve. Jurddan lei ahte galggai leat somá, muitala «Dieđát go?»-gilvvuid prográmmajođiheaddji Anne Marie Hætta Ávvirii.
Muđui lohká ahte sii ledje fárrolaga gilvvuidduopmáriin Toralf Baltoin ja bargojoavkkuin hábmen gažaldagaid gilvvuide iešguđetge fáttáid birra.
– Livččet vissa vástidit riekta jus máhtát sámegiela, sámi kultuvrra, geografiija, musihka ja Fearramiid birra, vástida Anne Marie Hætta mojiin jearaldahkii, go jerren mo ieš livčče vástidit gažaldagaide.
Mii lea «Dieđát go?»
«Dieđát go» lea nuoraidgilvu mii lágiduvvo jahkásaččat NRK Sámi Radios. Das lea guhkes historjá ja lágiduvvui vuosttaš geardde 1985:s. Dalle vuittii Kárášjoga nuoraidskuvla, nubbin ges šattai Deanu skuvla. Das rájes leat olu nuorat gilvalan ja vástidan feara makkár gažaldagaide. Jus «Dieđát go?» gilvvu galgá vuoitit de ferte diehtit veháš duon dán birra. Gažaldagat gilvvus guoskahit sihke olles máilmmi, muhto maid leat olu gažaldagat mat leat sámiid birra, ja sámi kultuvrra ja giela. Fáttát leat ovdamearkka dihte; Sámegiella, Matematihkka, Geografiija, Feara mii, Árbevierru ja olu eará.
