Vodka geavahit giehtabassansprihtan ii ávkkut korona- dávdda vuostá, váruha vodkabuvttadeaddji maŋŋel go leat ilbman dieđut ja rávvagat neahtas movt ieš ráhkadit desinfiserenbuktagiid.
– Mun ráhkadan giehtasprihta din vodkain. Giehtasprihtas ii leat heajos máhku ge. Máistte Tito vodka. Dat doalaha mu dearvvašin ja addá munnje seammás buori dovddu, čállá muhtin Twitteris gii lea Texasis eret.
Muhtin eará Twitter-geavaheaddji dieđiha ahte áigu ráhkadit ruovttudáhkkun giehtasprihta dainna vodkabuktagiin mainna sihkkarastá korona- dávdda vuostá. Goalmmát olmmoš ges ávžžuha vodkabohttala bidjat sadjogassii mainna gieđaid bassá.
Maŋŋel daid dieđuid ja rávvagiid movt ieš ráhkada giehtagelé vodkas, lea dagahan ahte buvttadeaddji lea almmuhan dieđu Twitteris mas váruha olbmuid. Olbmot fertejit čuovvut rávvagiid maid Amerihká dearvvašvuođaeiseválddit (CDC) ávžžuhit movt atnit giehtasprihta, deattuha Tito.
– CDC dieđuid mielde ferte giehtasprihtas unnimusat leat 60 proseantta alkohola. Min vodka lea 40 proseanta ii ge leat CDC rávvagiid mielde, čállá buvttadeaddji.
Twitter-geavaheaddjit leat vástidan buvttadeaddjái ahte sii ávžžuhit buvttadit vel garrasit sortta vodka.
(©NTB)
