Politiijat válde gitta ovtta dievddu disdateahkeda, go balle su rievidan ruđa poastavuoddjis Ivgubađas disdatiđida. Dievddu luite fas luovos eahkedis, muhto lea áššáiduhtton áššis man politiijat dutket.
– Ikte maŋŋelgaskabeaivvi válddiimet gitta ovtta dievddu gean várohit rievidan ruđa. Son beasai mannat go politiijat ledje dutkan su, ja son lea áššáiduhtton áššis, muitala Ivgubađa politiijabálvá Gaute Østeggen Ávvirii.
Duođalaš dáhpáhus
– Dáhpáhus lea duođalaš go suollagis lei bissu go rievidii ruđa, lohká Østeggen.
Lagamus politiijaguovllut leat dieđihuvvon dáhpáhusa birra, ja duollostašuvdna oaččui maid dieđu maŋŋel dáhpáhusa.
Politiijat leat maid geahčadeame vákšunkámeraid mat leat Ivgubađas.
Poastabargi, gii vásihii roavva rievideami, oažžu veahki bargoaddis.
Poastavuoddjit dolvot páhkaid, reivviid ja sáhttet maid álkit báŋkobargguid čađahit go leat jođus poastabiillain.
Suola geigii bissu
Ruhtasuoládeapmi galgá dáhpáhuvvan disdaga Ivgubađas, ja politiijat ožžo dieđu rievideami birra juste ovdal diibmu gávcci iđđedis.
Lei nisson boastabargi gii lei okto poastajuohkinvisttis, go muhtin skoalkkuhii uksii. Boastabargi rabai uvssa, ja suola geigii bissu su guvlui ja vázzái sisa. Suola vieččai ruđa ja manai fas viega.
– Suollagis lei bissu, muhto ii okta ge roasmmohuvvan, muitala Romssa politiijaguovllu operašuvdnajođiheaddji Steinar Gudmundsen.
Politiijabálvá Gaute Østeggen, gii lei poastaviesus 12 minuhta maŋŋel go diehtu bođii rievideami birra, geahččalii guorrat suollaga luottaid.
Orui čájeheame ahte suola lea biillain mannan.
Suollaga dovdomearkkat
Suola lea nuorra, seakka dievdu, birrasii 168 cm alu.
Sus ii lean njuovžilis eŋgelasgiella, liinniin lei čiehkan ámadaju, ja sus lei alit anoráhkka badjelis, sevdnjes buvssat ja suorbmafáhcat gieđain, lea boastabargi čilgen.
Ožžon cavgilemiid
Politiijat eai leat gávdnan ruđa, eai ge namuhuvvon biktasiid mat suollagis ledje.
– Mii leat ožžon oalle ollu cavgilemiid, muhto eai leat vuos doarvái dieđut ahte nagodit čoavdit ášši, muitala Østeggen, gii ii áiggo muitalit man ollu ruđas lea sáhka.
