Davvi-Suoma hálddahusriekti lea dubmen Anára gielddaráđđehusa ođđasit meannudit ášši go adde Davvi-suopmelaš Frozen Lake Husky fitnodahkii lobi hukset vásáhusturismabáikki Suoločielgái, čállá Yle Sápmi.
Gielda attii 2017 čavčča lobi hukset restaurántta ja beanasafaridoaimma Avvila bálgosa dehálaš guohtuneatnamii, vaikko ii lean gulaskuddan Avvila bálggusin ovdalgo dohkkehedje fitnodaga huksenohcamuša.
Hálddahusriekti čuovvulan bálgosa váidaga
Avvila bálgos váiddii Anára gielddaráđđehusa mearrádusa ja gáibidedje gomihit mearrádusa, mas leat addán fitnodahkii lobi hukset sierralágan visttiid guovdu bálgosa dehálaš guohtuneatnamiid.
Davvi-Suoma hálddahusriekti gomihii álgogease 2018 Anára gielddaráđđehusa mearrádusa.
Hálddahusrievtti mielde gielda ii lean dieđihan ohcamušas bálgosii, iige várren dilálašvuođa muittuhusa dahkamii, nugo eanageavahan ja huksenláhka gáibida.
Hálddahusrievtti mielde gielddaráđđehus lea ná meannudan boastut plánendárbbu čoavdima guoski ohcamuša dohkkeheamis ja galgá gieđahallat ášši ođđasit.
Avvila bálgosa boazoisit Ari Kustula vuordáge dál, ahte gielda guldala Avvila bálgosa ášši čuovvovaš gieđahallamis. Anára gielddas ášši gieđahallan joatkašuvvá, čállá Yle Sápmi.
