Oanehis filmmažat galget biddjot oktii vai šaddá guhkes filbman – ja dasa sáhttá vaikko gii searvat ja vaikko man gillii, beare lea filbmejuvvon Norggas.
Oanehis filmmažat galget biddjot oktii vai šaddá guhkes filbman – ja dasa sáhttá vaikko gii searvat ja vaikko man gillii, beare lea filbmejuvvon Norggas.
Filbmaprošeakta «Mellom oss» čájeha earáid perspektiivvaid.
Statistihkalaččat orrut mii ovtta dain buoremus riikkain máilmmis, muhto dávjjimus sivat manne mii fitnat doaktára luhtte leat psyhkalaš váttut, nu movt deprešuvdna, borranváddu, gárihuhttin ja ballu.
– Mii juogadit historjjáid go buot manná bures, muhto buohkat dihtet ahte eallimis leat erohusat ja buot sáhttá rievdat, čállá rešissevra ja Medieoperatørene prošeaktajođiheaddji Charlotte Røhder Tvedt preassadieđáhusastis.
Háliidit filmmaid sámegillii maid
Buohkat sáhttet searvat filmma ráhkadeapmái, ja sáddet filmmaža ovdal miessemánu 31. beaivvi 2016.
Sáhtát filbmet dan maid oainnát iežat birrasis, movt dus lea ja muitalit juoidá man it láve jitnosit dadjat. Filmmat galget leat filbmejuvvon miehtá Norgga.
– Mii háliidit filmmažiid sámegillii maid, ja juohkehaš sáhttá hupmat dan giela maid áigu, muitala «Mellom oss» buvttadeaddji Mari Monrad Vistven Ávvirii.
Hástalusaid čoavdit
«Mellom oss» neahttasiiddus leat logi hástalusa maid sáhtát čoavdit dađistaga iežat vuogi mielde. Deháleamos lea ahte lea dat maid don vásihat ja oainnát.
Filbma galgá erenoamáš go ii leat ovdal ráhkaduvvon unna filmmažiiguin maid earát leat filbmen.
Geahča: Filmmažat maid earát leat ráhkadan ja sádden sisa «Mellom oss» filbmii.
Guhkibuš filbman
«Mellom oss» galgá čohkkejuvvot guhkibuš filbman mas galget vuordámušat ja olbmuid oktavuođaid birra, ja galget leat iešguđetlágan muitaleaddjit.
– Min mihttu lea ráhkadit rehálaš, suohtas filmma mas bures dovdá movt lea leat olmmožin, muitala rešissevra Tvedt.
Filbma galgá čájehuvvot Aftenposten TV:s boahtte jagi, ja buohkat, geat leat mielde ráhkadeame filmmažiid, ožžot filbmadahkki namahusa.
Buvttadeaddji lohká dehálažžan ahte filbmejuvvo vealu govas jus mobiltelefuvnnain filbme, ja ahte jurddaša jiena birra go filbme. Ii ábut ieš čuohppat filmma, muhto sáddet divotkeahttá filmma.
