– Du haga in livčče soaitán dás!

Lea jagi áigi go Anne Marit Gaup gájui ­olbmás Inga Kirsten Ragnhild Kemi go váibmu bisánii. Vaikko Inggá mielas ii leat nohkka giitun dat, de geigii aŋkke liđiid ja gáhku giitun iežas heakkas.

Lea áibbas dábálaš beaivi. Inga Kirsten Ragnhild Kemi lea leamaš boradeamen Pitstop boradanbáikkis Guovdageainnus fárrolaga iežas olbmáin, Anne Marit Gaupain. Eaba hohpohala odne, go eaba leat vuolgime gosage. Mannaba Ánne Máreha vissui, ja de geavvá juoga mii bisána Ánne Máreha muitui agibeaivái.

Inga Kirsten Ragnhild rádjá iežas diŋggaid sehkkii, ovdal go čohkkeda suffái vuoiŋŋastit. 

– Ale dieppe čohkká okto, boađe deike gievkkanii čohkkát, čurve Ánne Máret.

Son lea aiddo čohkkedan beavdegurrii, go visot čáhpoda.

Ánne Máret ii álggos suorgan, ii ge ipmir ballat go oaidná olbmá gahččan. Geahččala hupmat suinna, muhto go ii oaččo vástádusa, ballagoahtá. Fuomáša ahte ivdni ámadajus lea rievdan. Heđiin čuorvugoahtá iežas mánáide geallárii, ja ieš gaikkeha su láhttái.

Heakkagádjun álggahuvvo dan seammás go ambulánsa lea telefovdnageažis. Ánne Máret lea šohkas. Ambulánsabargi telefovdnageažis geahččala veahkehit. Ánne Máret dahká dan maid bargi sihtá su bargat. Go deaddá 30 gearddi su ratti nu go heaggagádjumis galgá, de gullá ja dovdá ahte ruošká. Dávttit doddjojit. Dat dahká su eambbo ballui, muhto ii bisán go gullá Inggás jienaid. Áigi manná, ja son viimmat vuoigŋagoahtá fas. Gávcci minuhta bargá Ánne Máret heaggagádjumiin.

Gávcci minuhtas olle feara mii jorrát Ánne Máreha jurdagiin ovdal go Ingá vuoigŋagoahtá. Earret eará movt dán galgá muitalit Inggá lagasolbmuide. Su niidii, su váhnemiidda, su vieljaide. Hávdádeapmi. Visot orru nu veadjemeahttun. Visot lea dál su duohken. Jus son ii daga dán riekta, de ii soaitte mannat bures. Gávcci minuhtta ii leat goasse bistán nu guhká go dán beaivvi dagai.

Ambulánsa olle, ja váldet badjelasas heaggagádjuma. Barget oanehaš, ovdal de dolvot su Guovdageainnu dearvvašvuođaguovddážii.

Go dearvvašvuođaguovddážii lea ollen, de gal mannagoahtá buorebut. Ingá ieš vástida go Ánne Máret maide fal jearaha sus.

– Vaikko orun leamaš gozuid alde, de aŋkke in muitte ieš maide doppe, čilge son.

Áigi dan rájes go bohte dearvvašvuođaguovddážii dassái go fas sáddejuvvui viidáset, lea eahpečielggas goappašagaide.

– Lea nu olu maid in muitte maŋŋel go vulgen ruovttus, go olliimet dearvvašvuođaguovddážii – man guhká doppe leat leamas, lohká Ánne Máret.

Ingá sáddejuvvo ambulánssain viidáset Áltái, gos girdi galgá doalvut su Romsii.

– Go Álttás bisánit váldit mu nieidda mielde, de orun dego muitime ahte oidnen alit čuovgga ambulánssas. Oidnen gal maid mu nieidda, muhto nohkken dušše viidáset. Dat lea maid muittán dien tuvrras, de in muitte šat ovdal go veahá gullástin girdis jođus Romsii, muitala Ingá.

Gaskaija, seamma beaivvi, riŋge Romssa buohcciviesudoavttir Ánne Márehii. Doavttir jearaha veahá dáhpáhusa birra, ja muitala movt dál manná.

– Jearralin sihkarvuođa dihte doaktáris daid ruoškasiid birra maid ledjen gullan Inggá rattis. Doavttir duođaštii ahte ledje doddjon dávttit, muhto ahte ledjen bargan riekta. Dát lei juoga mii lei váivvidan mu dan rájes go Ingá fas vuoigŋagođii, ja lei beassan doaktáriid lusa. Muhto go doavttir duođaštii ahte dat ii dahkan maide, de easka nagodin nohkkat, lohká Ánne Máret.

Romssas Ingá opererejuvvui. Guovvamánu 27. beaivvi bidje sutnje ICD váibmomašiinna mii galgá álggahit fas váimmu jus bisána.

Inga Kirsten Ragnhild orru Álttás, ja lea hui giitevaš go juste dán beaivvi lei Guovdageainnus.

– In duostta jurddašallat ge movt livččii mannan jus livččen ruovttus dán beaivvi. Go orun okto, de livččen hui sihkkarit okto ruovttus, lohká son.

Heakka ii sáhte veardidit mainna ge, muhto Inga Kirsten Ragnhild giitá olbmá liđiiguin ja gáhkuin.

– Lean nu giitevaš, in ge dieđe movt galggan giitit. Ii mihkke leat divrasit go olbmoeallin, muhto áiggun čájehit ahte lean giitevaš dan ovddas maid Ánne Máret dagai, liđiiguin ja gáhkuin, loahpaha Inga Kirsten Ragnhild Kemi.