Kevin Andre Boine lávlla «Drømmeland» lea guldaluvvon badjel 2 miljovnna geardde.
Sámi artistta Kevin Andre Boine lávlla «Drømmeland» lea guldaluvvon badjel 2 miljovnna geardde.
Dan oktavuođas lea sutnje geigejuvvon golletrofea.
Hui somá
Boine ii lean jáhkkán iežas oažžut dákkár mearkkašumi musihkkamáilmmis.
– Ii leat dábalaš ahte artisttat, geat eai leat nu stuorrát Norggas, ožžot dákkár mearkkašumi, nu ahte lea hui somá. Go ožžon dán, de mus lei dakkár dovdu maid in máhte čilget, dadjá son.
Movttiidahtti
Go Boine «Drømmeland» lea guldaluvvon badjel 2 miljovnna geardde, muitala dat man ollugiid son lea olahan dainna. Dát movttiidahttá su joatkit musihkain.
– Diehttelas lea dat hui movttiidahtti. Dagaha maid ahte lea álkit olahit olbmuid, go leat nu ollusat gullan mu lávlaga, dadjá son.
– Dál áiggun ain ráhkadit lávlagiid ja lávlut iešguđet báikkiin. Leat gal maid muhtun čiegus plánat maid in vel áiggo almmuhit. Sáhtán gal duođaštit ahte geasi mielde almmuhan ođđa lávlagiid.
Guhkes geassi
Kevin Andre Boine lea oaidnimis olu festiválain dán geasi.
Sihke Skarven festiválas, Midnattsrockenis, Taiga festiválas Suomas ja Høstsprellas.
