Otná suohkanstivrračoahkkima ovdalaš Álttás čielggai ahte Ovddádusbellodaga Ellinor Nilsen lea geassádan iežas bellodagas, ja nu gomihii ovttasbarggu maid Ovddádusbellodat, Olgeš, Riddobellodat, Gurut ja Guovddášbellodat ledje soahpan.
Dat dagahage ahte Ovddádusbellodaga Ronny Berg ii šatta sátnejođiheaddjin. Ronny Berg lea issorasat behtohallan ja lohká lea hui váidalahtti go lea okta sin bellodagasa guhte na jorggiha.
– Ellinor lea leamaš guhka mielde, ja go son na hui loahpas vállje beahttit ii dušše mu muhto olles bellodaga ja ovttasbargo guimmiid ja doarjut baicca Bargiidbellodaga, de lea dat hui váidalahtti, lohká Berg.
Doarju Bargiidbellodaga
Ellinor Nilsen njuikege Bargiidbellodaga, Sosialisttalaš gurutbellodaga, Risttalaš álbmotbellodaga ja Birasbellodat ruoná beallai, ja nu doarju Bargiidbellodaga Monica Nielsena sátnejođiheaddjin.
Hirpmášstuvvon
Rut Olsen, Riddobellodaga njunuš ii ge ipmir movt sáhttá maŋemus minuvttas ná šaddat.
– Ellinor Nielsen ii beahte dušše iežas bellodaga, muhto olles vihtta belldaga lea son dájuhan.
Mun lean hirppmáhvvan dál, muhto dan gal lea lohpi dákkár dilis. Dál fertet hábmet listtu ođđasit ja oaidnit movt ain šaddá ovddasguvlui, dadjá son.
Guđđe čoahkkima
Diibmu logis galggai suohkanstivra álggahuvvot ja áššelisttu dohkkehuvvot, muhto Berg joavku guđđe čoahkkima proteastas ja čoahkkin maŋiduvvui diibmu 13.00 rádjai.
Ronny Berg ja su ovttasbargo guoimmit guđđe suohkanstivrračoahkkima proteastas. Govven: Marit Elin Kemi
Gergosat otne vuođđudit
*/
Bargiidbellodaga Monica Nielsen dajai ovdalaš go vihtta bellodaga guđđe čoahkkima, ahte čoahkkin lea lobálaččat gohččojuvvon, ja bellodagat geat leat bovdejuvvon dasa , berrejit leat ráhkkanan ahte ná sáhttá dáhpáhuvvat. Sii eai dohkket maŋideami, ja leat gergosat vuođđudit suohkanstivrra odne.
*/
*/
Bottu maŋŋel diibmu beal ovttas, eai lean boahtán dat vihtta bellodaga vel suohkanstivrra čoahkkinlatnjii.
Bargiidbellodaga Monica Nielsen ii leat gal vuollánan:
– Mii leat iskame sáhttet go váldit bottu ihttážii diibmu logi rádjai, ja doallat de konstituerenčoahkkima mas válljejit sátnejođiheaddji, ovdagotti, várresátnejođiheaddji, dárkkistanlávdegotti, ja dohkkehit válgga. Sáhttá dieđusge ádjánit cegget lávdegottiid, ja danne iskat dál sáhttá go maŋidit vai bellodagat besset hutkat daid lagabui, ja lea álkit nu go váldit visot oktanis, dajai Nielsen.
Nielsen lohká ožžon dieđu sis geat eai leat siste, ahte eai áiggo boahtit ihttin čoahkkimii.
– Min mielas lea guhká vuordit nuppi mánnodahkii,livččii buoret maŋidit duorastahkii dahje bearjadahkii, muhto vuosttažettiin áiggošeimmet ihttin juo doallat.
Maŋiduvvo vahkuin
Sátnejođiheaddji Laila Davidsen dajai ahte jus son lea gulahallan singuin geat leat geassádan čoahkkimis, ja leat dieđihan sii eai boađe ihttin.
– Mun válddán vuhtii ahte dat 17 áirasa mielas lea oanehis áigi čoahkkanit juo ihttin. Danne doallat ođđa suohkanstivrra čoahkkima vahkku geahčen, golggotmánu 26. beaivi, ja mun ávžžuhan válgalávdegotti čoagganit ovdal dan, dajai Laila Davidsen ja dearpalii veahčiriin beavdái.
