Sámediggeráđđi lea juolludan ruđa sámi giellaprošeavttaide, ja lea dán háve vuoruhan giellaprošeavttaid lulli-, bidum- ja julevsámi guovllus. Earret eará oažžu Røros gielda 300.000 ruvnno ásahit ođđa lullisámegiel ođasneahttabáikki.
Sámediggeráđđi lea juolludan ruđa sámi giellaprošeavttaide, ja lea dán háve vuoruhan giellaprošeavttaid lulli-, bidum- ja julevsámi guovllus. Earret eará oažžu Røros gielda 300.000 ruvnno ásahit ođđa lullisámegiel ođasneahttabáikki.
– Lullisámegiella lea nanusmuvvame maŋŋel go lea leamaš garrasit áitojuvvon. Ásahit lullisámegiel ođaskanála sáhttá mearkkašit hui olu dan dáfus ahte lullisámegiella nannejuvvo beaivválaš giellan, dadjá sámediggepresideanta Aili Keskitalo preassadieđáhusas.
– Mihttu ásahit lullisámegiel ođasneahttabáikki
Prošeavttas lea mihttun ásahit lullisámegiel ođasneahttabáikki mas leat ođđasat mat gusket lullisápmelaččaide, ja oažžut sadjái lullisámegielat doaimmahusa.
– Min mielas lea dehálaš ahte lullisápmelaččat ožžot ođđasiid ja eará áigeguovdilis áššiid iežaset gillii. Dákkár neahttasiidu sihke nanne ja ovddida lullisámegiela, dadjá Keskitalo.
Lullisámegiela seminára ja sámi filbmafestivála
Eará lullisámegielat prošeavttat mat leat ožžon doarjaga leat Trøndelaga Fylkkasuohkan/Aajege giellaguovddáš, mat ožžot 100.000 ruvnno doarjjan lágidit seminára Gïeleviermie, lullisámegiela dili birra, Rørosas skábmamánu 7.- 8. beivviid.
Røros gielda ges oažžu 80.000 ruvnno lágidit rájáidrasttildeaddji sámi filbmafestivála skábmamánu 7.- 10. beivviid.
Dát festivála šaddá oassin Raasten Rastah festiválas, mii lágiduvvo juohke jagi.
Doarjja bidumsámegiela ealáskahttimii
Duoddara Ráfe searvi, Beiarn gielddas, oažžu 300.000 ruvnno bidumsámegiela ealáskahttimii.
Earret eará galgá Duoddara Ráfe ovttasbargat ruoŧabeal bidumsámi giellaberošteddjiiguin.
Julevsámegiela guovllus oažžu ges Hápmir suohkan 75.000 ruvnno giellakursii mánáide geain lea sámegiella vuosttašgiellan, ja 75.000 ruvnno giellakursii mánáide geain lea sámegiella nubbingiellan.
Girjjálašvuođadeaivvadeamit, giellakursa, mátkkoštan-app ja konfirmašuvdnaleaira.
Maiddái davvisámegielat prošeavttat ožžon
Maiddái davvisámegielat prošeavttat leat ožžon doarjaga.
Čálliid lágádus oažžu 300.000 ruvnno doarjjan prošektii «Sámegielat girjjit ohcet geavaheddjiid».
Prošeakta lágida 25 deaivvadeami main girječállit guoimmuhit mánáid ja nuoraid lohkama ja neaktima bokte.
Unjárgga gielda oažžu 150.000 ruvnno giellakursii man mihttun lea veahkehit olbmuid geat leat vázzán sámegiel álgokurssa sámástišgoahtit.
Doarjja mátkkoštan-appii
Sámediggeráđđi lea maid juolludan 200.000 ruvnno prošektii Bædi & Børdi, mii lea mánáid várás mátkkoštan-appa mas leat dieđut sámegillii Davvinorgga turistabáikkiid birra.
Sámi girkoráđđi oažžu ges 150.000 ruvnno prošeaktadoarjjan lágidit sámi konfirmašuvdnaleairra.
Dán jagi lea guđát geardi go dát leaira lágiduvvo.
– Lea erenoamáš illudahtti go mii juste eamiálbmotgielaid jagis vásihit ná stuora beroštumi čađahit giellaprošeavttaid, dadjá sámediggepresideanta Aili Keskitalo loahpas preassadieđáhusas.
