Boazodoalu ja boazodoallohálddahusas ferte leat buoret gulahallan, ja nuppi oaiviliid buorebut dohkkehit. Dat lea čoahkkáigeassu raporttas movt galgá buorebut doaimmahit iešstivrejumi boazodoalus.
Boazodoalu ja boazodoallohálddahusas ferte leat buoret gulahallan, ja nuppi oaiviliid buorebut dohkkehit. Dat lea čoahkkáigeassu raporttas movt galgá buorebut doaimmahit iešstivrejumi boazodoalus.
Norgga Boazosápmelaččaid Riikkasearvi ja Eanandoallo- ja Biebmodepartemeanta ásahedje bargojoavkku mii galggai geahčadit movt siskkáldasat sáhttá čađahit iešstivrejumi boazodoalus. Dál lea loahpparaporta gárvvis.
Raportabarggus lea bargojoavku geahčadan Stuoradikki, dutkamiid, guorahallamiid, statistihkaid ja jearahallamiid dokumeanttaid.
Bargojoavku lea maid čađahan čoahkkimiid ealáhusain árbevirolaš sámi boazodoallomáhtu ja dábiid birra.
Bargojoavku oaidná dehálažžan ahte hálddahus ja ealáhus dihtomielalaččat ipmirdit makkár vuođđu ferte leat go galgá siskkáldas iešstivrejumi oažžut bures doaibmat.
– Lea dehálaš ahte biddjojit návccat proseassaide mat gusket gulahallamii ja nuppi oaiviliid dohkkeheapmái, čállá Romssa Fylkkamánni neahttasiiddus.
Bargojoavku evttoha doaimmaid:
Boazoealáhussii doaimmat:
– Máhttoloktendoaimmat boazodoalloealáhussii.
– Viidáset ovdánahttit geavahannjuolggadusaid siskkáldas iešstivrema stivrendokumentii.
– Priváhtarievttálaš orgána boazodoalloealáhusa máhttooahpahussii.
– Ásahit báikkálaš riidočoavdinmekanisma.
Boazodoallohálddahussii doaimmat:
– Guhkit áiggi bargu doibmii bidjat siskkáldas iešstivrejumi.
– Čielgasit oažžut ovdan Boazodoallostivrra rolla.
– Loktet Eanandoallodirektoráhta máhtu.
– Guorahallat ja loktet gelbbolašvuođa mii guoská fylkkamánni rollii.
– Fylkkamánnis ferte stuorát ovddasvástádus orohatplánain.
