Dálkkádat- ja birasdepartemeantta stáhtačálli Lars Andreas Lunde dadjá ahte «Deanošiehtadusa» evttohusain leat doarvái bures váldán vuhtii báikkálaš berošteddjiid oainnuid.
Dálkkádat- ja birasdepartemeantta stáhtačálli Lars Andreas Lunde dadjá ahte «Deanošiehtadusa» evttohusain leat doarvái bures váldán vuhtii báikkálaš berošteddjiid oainnuid.
Otná báberaviissas čállit go Finnmárkkubeaŋka Stuoradikkis lea gáibidan ráđđehusa ođđasit šiehtadallat dahje oalát bálkestit Deanočázádaga soahpamuša mii lea leamaš gulaskuddamis ja dál lea meannudeamis ráđđehusa dásis.
Dan viđa Finnmárkku stuorradiggeáirasa mielas ii leat govttolaš addit Suoma beale bartaeaiggádiidda eambbo vuoigatvuođaid seammás go gáržžidit báikkálaš olbmuid bivddu.
Sii maiddái moitet go Suoma eiseválddiide addo váldi váikkuhit mearraluossabivddu Finnmárkku rittus.
Doarvái doahttalan
Dálkkádat- ja birasdepartemeantta stáhtačálli Lars Andreas Lunde ii loga iežaset vel vástidan Finnmárkkubeŋkii reivve man leat sádden ráđđehussii, ii ge loga dan áigut dahkat medias.
Son aŋkke kommentere obbalaš dásis ahte ráđđehusa bealis oidnet šiehtadallamiid doarvái bures čađahuvvon.
– Min oainnu mielde leat báikkálaš beroštumit doarvái bures váldon šiehtadallamiin. Ii leat riekta bálkestit soahpamuša, go Suoma beale turistabivdu lea evttohuvvon garrasit gáržžiduvvot, nu ahte ii leat dušše báikkálaš bivdiid luossabivdu mii gáržžiduvvo, dadjá Lunde.
Boastut ipmirdan
Stáhtačálli Lars Andreas Lunde mielas maid boastut ipmirduvvon ahte Norga áigu addit eambbo válddi Suoma eiseválddiide váikkuhit Finnmárkku mearraluossabivddu.
– Norggas lea juo dakkár soahpamuš sihke Suomain ja Ruoššain ahte galgat dieđihit daidda riikkaide jus mihkke rievdaduvvo mearraluossabivddu hálddašeamis. Dat ii leat mihkke ge ođđasiid, muhto leat dušše dan bidjan mielde Suoma ja Norgga ođđa šiehtadussii. Ii ge dat mearkkaš ahte Norga iešheanalaččat ii beasa hálddašit luossabivddu Norgga rájiid siskkobealde.
Son čilge «Deanošiehtadus» lea dákkár ášši man ráđđehus sáhttá ieš mearridit, nu ahte dan ii dárbbaš Stuorradiggi meannudit.
– Dá lea dákkár ášši man ii dárbbaš Stuorradiggi mearridit, muhto šiehtadusa čuvvo mielde muhtun ekonomalaš geatnegasvuođat. Dan dihte ferte ášši meannuduvvot Stuorradikkis, čilge Lars Andreas Lunde.
– Mii geavvá jus Stuoradikki eanetlohku ii juollut ruđa šiehtadussii?
– Stuorradiggi ii galgga juolludit ruđa go dát ášši meannuduvvo. Dat dahkko dábálaš bušeahttaproseassain.
Ipmirda moaitagiid
Lars Andreas Lundii ii loga váttisin ipmirdit go moitet beare oanehis áiggi leamaš gulaskuddamis, muhto son lea liikká oadjebas ahte gulaskuddamat leat čađahuvvon dohkálaččat.
Su oainnu mielde ii sáhte ge ráđđehus jorgalahttit šiehtadusaid mat leat dahkkon ja álgit ođđasit Suomain šiehtadallat go dát lea stuorra ja viiddis ášši.
– Šiehtadus lea juo badjeláiggis go dat livččii galgan juo fámus 2015:s. Ferte jođáneamos lági mielde boahtit ođđa šiehtadus sadjái, mii buorebut váldá vára Deanu luosain. Odne goddojit beare ollu luosat Deanočázádagas man ferte ráddjet, dadjá Lars Andreas Lunde.
Lunde deattuha ahte sii eai leat mearridan maide Finnmárkkubeaŋkka gáibádusaide, go dan vástádusa galget ovddemuš oažžut dat vihtta stuorradiggeáirasa.
