Guovdageaidnu, Romsa, Kárášjohka leat muhtin báikkit gos ain háliidit čájehit solidaritehta.
Vaikko miellačájeheamit ja akšuvnnat olmmošvuoigatvuođaid rihkkuma oktavuođas Norgga oaivegávpogis leat loahpahuvvon ikte, de ain olu báikkiin Sámis lágiduvvojedje dahje galget lágiduvvot doarjjalágideamit Fovsen-áššis.
Guovdageaidnu
Odne, njukčamánu 4. beaivvi, bovdejuvvojit olbmot Guovdageainnu ráđđehusa olgobeallái gos prográmma álgá diibmu 12.00.
– Álbmotčoahkkimis Guovdageainnu kulturviesus guovvamánu 28. beaivvi čájehuvvui ahte Guovdageainnu álbmogis lea stuorra doarjja nuoraide geat bealuštit Fovsen-ášši, ja gáibidit ahte Norgga riika čuovvu olmmošvuoigatvuođalágaid, nu muitalit lágideaddjit Facebookas mii lea duogážin lágideapmái.
Lágideami bargojoavkkus leat earet eará Marit Susanne Utsi, Ingá Márjá Sarre ja Svein Lund. Håkon Isak Vars galgá láidestit prográmma.
Romssas
Romssa toarggas odne diibmu 12.00 háliidit čalmmustahttit nuoraid geat leat aktiivvalaččat oassálastán miellačájehemiin ja akšuvnnain Oslos.
– Dainna mii háliidit giitit min áŋgiris, duostilis ja viššalis nuoraid ja rávisolbmuid geat leat bargan Fovsen-ášši ovdii.
Lágideaddjit muitalit Facebookas ahte ceggejit lávvu, guossohit gáfe, ja olbmot besset maiddái njoarostit. Romssa sátnejođiheaddji Gunnar Wilhelmsen maid searvá lágideapmái.
Kárášjohka
Dáppe áigot duorastaga, njukčamánu 9. beaivvi, diibmu 14.00 doallat čalmmustahttima olggobeale Sámedikki.
– Mii oaivvildit lea dehálaš čájehit doarjaga Fovsen sámiide, ja čájehit ahte eat sáhte dohkkehit dan ahte olmmošvuoigatvuođaid rihkkun ain joatká.
Lágideaddjit ávžžuhit gárvodit bures go einnostit buollašiid.
