Sámediggeráđđi juolludan 114 000 ruvnno Verddefestivála ovdáneapmái.
Návuona suohkan, ollásit eaiggáduvvon suohkanlaš fitnodaga Kvænangen Næringsfabrikk AS bokte, hálliida viidáseappot ovddidit árbevirolaš Verddečiekčamiid vai šaddá stuorát, jahkásaš Verddefestivála.
Sámedikki mielas lea dát buorre áŋgiruššan mii sáhttá leat mielde oainnusmahttimin sámi kultuvrra ja sámegiela muđui Návuonas ja Davvi-Romssas.
Sámediggi doarju festivála ovddideami 114 000 ruvnnuin vai sáhttá ovddidit guhkesáigásaš festiválakonseaptta. Doarjja váldo Sámedikki regionála ovddideami ortnegis.
– Mii leat ilus go háliidit viidáseappot ovddidit Verddečiekčamiid Návuonas. Verddečiekčamiin leat guhkes árbevierut ja mii jáhkkit ahte Verddefestivála ođđa konseapta sáhttá lihkostuvvat, dadjá Sámediggepresideanta Silje Karine Muotka preassadieđáhusas.
114 000 ruvdnosaš doarjja juolluduvvo doarjjaortnegis: Regionála ovddidanprošeavttat.
