Son moaitá dovddus Norgga girječálli Jo Nesbø go noveallas govahallá sápmelaččaid dološ ovdagáttuid vuođul, ja dan vuođul ballá vearu govva fievrriduvvot máilbmái.
Son moaitá dovddus Norgga girječálli Jo Nesbø go noveallas govahallá sápmelaččaid dološ ovdagáttuid vuođul, ja dan vuođul ballá vearu govva fievrriduvvot máilbmái.
Sosiála median lea maŋemus beivviid juogaduvvon govva dovddus girječálli Jo Nesbø girjjis «Karusellmusikk». Girjjis leat 11 novealla, ja leage «Animal planet» noveallas mas sámiid govvideapmi lea boktán reakšuvnnaid.
Unohas
Dáiddár ja ovddeš Sámi allaskuvlla ofelaš Sarakka Gaup ii liiko go nu ovttageardánit govviduvvot sápmelaččat. Son moaitá go Nesbø noveallas čállo ahte sámit leat ovttaláganat olggosoaidnit ja hupmet mihtilmas «sámi» šuoŋain.
– Dat lea áibbas boastut, go mii sámit han leat iešguđetláganat ja eat ollinge huma seamma ládje. Lea hui unohas go dovddus girječálli, gean girjjit addojuvvot olggos máŋgalogi gillii, boastut govvida sápmelaččaid, lohká son.
Vuorkágovva
Ii leat humorčálli
Gaup lohká Nesbø govahallan sámiin lea seammalágan go maid revyain ja neahttastáluin gávdná.
– Nesbø han lea duođalaš krim čálli, iige humorčálli, nu ahte maid son čállá váldojuvvo duođaleappo. Nu šaddá ollusiidda olgoriikas su govahallan duohtavuohtan geat lohket su girjjiid, ja dat lea ii leat áibbas vuogas, oaivvilda Gaup.
Gaup ii leat lohkan olles Nesbø girjji, muhto sávvá dat lea dušše novealla karaktera oaidnu, iige iežas girječálli.
– Mun háliidan jáhkkit ahte Nesbøas ii leat rasisttalaš, ja eai duođai leat nie dološ jurdagat sámiid birra, lohká son.
Ávvir ii leat lihkostuvvon oažžut Jo Nesbø ságaide.
