Viđátlot-jahkásaš váhnenguovttos, geat fáhkka duššaiga iežaska ruktui Geaissvearas, galgaba iskkaduvvot disdaga.
Viđátlot-jahkásaš váhnenguovttos, geat fáhkka duššaiga iežaska ruktui Geaissvearas, galgaba iskkaduvvot disdaga.
– Sáhttá ádjánit vahkku ovdal go gaskaboddosaš obdukšuvdna-raporta lea gárvvis. Ollis raporta sáhttá ádjánit golbma mánu hábmet. Jápminsiva eat várra gávnnat ovdal go obbalaš raporta lea, lohká Finnmárkku politiijaid politiijaadvokáhtta Karoline Johansen NTB:i.
Varalaš streptokokkat
Jápmimiid leat gohčodan imašin. Sivvan lea go váhnenguovttes leigga nu nuorat, ja go jámiiga seamma sadjái.
Sotnabeaivvi lei álbmotčoahkkin Geaissvearas. Doppe bođii ovdan ahte váhnenguovttes leigga buohcan ovddit lávvordaga rájes. Duorastaga leigga doaktára luhtte, ja oaččuiga dálkasiid streptokokkaid vuostá, dieđihii Runar Elde Finnmárkku politiijain.
Doavttir várrii
Ii leat vel duođaštuvvon ahte jámiiga streptokokkaid dihte. Sudno leat maŋemuš oaidnán heakkas duorastaga eahkeda, lohká Elde.
Čoahkkimis várrii suohkandoavttir Erik Langfeldt ahte muhtun sorttat streptokokkat sáhttet leat váráleappot go earát, ja bivddii olbmuid váldit oktavuođa doaktáriin jus dovdet makkár ge mearkkaid ahte soaitá čotta bávččas.
(©NTB)
