Odne álggii diggi gos galgá meannuduvvot gii galgá beassat mearridit siidaoasi boazologu.
Odne álggii diggi gos galgá meannuduvvot gii galgá beassat mearridit siidaoasi boazologu.
Guovdageainnus álggii odne diggi gos siidaoasi boazolohku juohku galgá meannuduvvot.
Lea siidaoasi eaiggát gii lea gáibidan ahte siidaoasi miellahtut galget unnidit boazologu ja sii deaivvadit dál dikkis.
Vuođđu lea gii galgá mearridit
Duopmár Finn Arne Selfors čilge ahte ášši vuođđu lea gii galgá beassat mearridit boazologu juohke siidaoasis.
Ášši lea ovdal leamaš dikkis ja dalle mearriduvvui ahte siidaoasi eaiggát galgá beassat mearridit miellahtuid boazologu.
Dat lei 2006:s, jagi ovdal go ođđa boazodoalloláhka bođii, ođđa lágas čuožžu ahte lea siidaoasi eaiggát gii galgá beassat mearridit boazologu.
Dát lea vuosttaš dákkár ášši mii meannuduvvo diggevuogádagas ,dan rájes go boazodoalloláhka ođastuvvui 2007:s.
Gáibidan njuovvat 20 heggii
Ášši vuolggaheaddji lea gáibidan ahte golbma miellahtu galget vuolidit boazologu 20 heggii guhte ge, 60 heggii oktiibuot.
Lea maid gáibidan ahte biddjojit sáhkut johtui, nu guhká go boazolohku lea eambbo go 20 heakka juohke olbmos. Dasa lassin lea gáibidan ahte ášši vástideaddjit mákset áššegoluid.
Ášši vástideaddji leat cealkán ahte sis lea riekti eaiggáduššat guokte goalmmádasoasi siidaoasi boazologus. Sii leat gáibidan ahte sáhkut hilgojuvvojit ja ahte besset áššegoluin.
Ávvir čuovvu dikki.
